पूर्वमन्त्री थापाका स्वकीय सचिवको निस्सासिएर मृत्यु

१६ माघ, ललितपुर । ललितपुरको तिखिदेवलस्थित एउटा फिटनेस सेन्टरमा साउना बाथ लिन गएको एक जोडीको हिजो राति निस्सासिएर मृत्यु भएको छ । स्थानीय फिट एण्ड फाइन्ड एरोबिक सेन्टरमा साउना बाथ लिन गएका हस्तगर्बुजा मगर र उनकी पत्नी नेत्रकुमारीको गए राति मृत्यु भएको प्रहरीले जनाएको छ ।

साँझ ६ बजे साउना बाथ लिन छिरेको जोडी लामो समयसम्म बाहिर ननिस्किएपछि ढोका खोलिएको थियो । बेहोस अवस्थामा भेटिएका दम्पतिलाई तत्कालै अस्पताल लगिएको थियो । तर चिकित्सकले दुबैको निस्सासिएर मृत्यु भएको घोषणा गरेका थिए ।

म्याग्दीको मालिका गाउँपालिका-४ का मृतक हस्तगर्बुजा पूर्वमन्त्री थममाया थापाका स्वकीय सचिव थिए । थापा र मगरकाे पारिवारिक सम्बन्ध पनि रहेकाे  थियाे । अहिले जिम सञ्चालिका जुना बस्नेतलाई सातदोबाटो प्रहरीले नियन्त्रणमा लिएर थप अनुसन्धान गरिरहेको छ ।

यो घटनापछि प्रहरीले सञ्चालिका बस्नेतलाई अनुसन्धानका लागि नियन्त्रणमा लिएको हाे । चार-पाँच जना सञ्चालकमध्ये उनी एक हुन् । मगर दम्पतिका छोरा लिङ्कन गर्बुजा र छोरी मेगमी गर्बुजा भने साे समयमा घरमा नै रहेका पारिवारिक स्राेतले नेपालबहस डटकमलाई बतायाे । चारै जना परिवार ललितपुर-१४, नखिपाेटमा बस्दै आएका थिए ।