एमसीसी कार्यदलको पहिलो बैठक

२० माघ काठमाडौं । संसद्मा झण्डै दुई तिहाई समर्थन प्राप्त नेपाल कम्युनिष्ट पार्टी भित्र चरम विवादमा परेको अमेरिकी सहयोग मिलेनियम च्यालेञ्ज कर्पाेरेशन ( एमसीसी )को भविष्य निर्धारण गर्न आज पाटीद्वारा गठित कार्यदलको बैठक बसेको छ ।

हिजो मात्र सम्पन्न केन्द्रीय कमिटीले वरिष्ठ नेता झलनाथ खनालको संयोजकत्वमा गठन गरेको कार्यदलको पहिलो बैठक आज पार्टी कार्यालय धुम्बाराहीमा बसेको हो । संसद्बाट अनुमोदन गराउनुपर्ने एमसीसीबारे उचित निर्णय लिन खनाल नेतृत्वको कार्यदललाई १० दिनको म्याद दिइएको छ । कार्य दलमा नेता भीम रावल र परराष्ट्रमन्त्री प्रदीय ज्ञवाली सदस्य रहेका छन् ।

संयोजक खनाल र सदस्य रावल एमसीसीको विपक्षमा छन् भने ज्ञवाली पारित गरी सहयोग लिनु पर्ने पक्षधर हुन् । कार्य दलमा रहेका सदस्यहरु मध्ये विपक्षी धारका दुई जना रहेकाले संसद्बाट अनुमोदन गर्न नहुने राय आउने संभावना रहेको बताइन्छ । तर प्रधानमन्त्री के पी ओली र पार्टीका कार्यकारी अध्यक्ष पुष्पकमल दाहाल प्रचण्डले खनाललाई एमसीसीबारे कन्भिन्स गराइसकेकाले पक्षमा राय आउने बताइएको छ ।

नेता रावल भने कुनै पनि हालतमा एमसीसी नेपाल भित्रन दिन नहुने पक्षमा अडिग रहेको बताइन्छ ।प्रधानमन्त्री ओली , अध्यक्ष प्रचण्ड र विपक्षी दलका नेता शेरबहादुर देउवा समेत एमसीसीको पक्षमा रहेकाले संसद्बाट सहजै पास हुने अवस्था छ । कार्य दलका संयोजक खनाल पनि अमेरिकासँग जोरी खोज्ने अवस्थामा नरहेकाले पोजेटिभ सुझाव प्राप्त हुने ओली निकट स्रोतले बताएको छ ।