क्यान्सर बिरुद्धको अभियानमा सेन्ट जेभियर्स कलेजको सातौं साइकल र्याली

२२ माघ, काठमाडौं । निजी कलेजहरु मध्य उत्कृष्ठ मानिने सेन्ट जेभियर्स कलेज माइतीघरले सोसियल सर्भिस, इन्भाईरोमेन्ट एन्ड टेक्नोनोलोजी (सेट) काउन्सिलको आयोजनामा सातौँ साइकल र्याली सम्पन्न गरेको छ ।

यही माघ १८ गते सम्पन्न भएको कार्यक्रममा रिचा बजिमय मेमोरियल फाउन्डेशनले सहकार्य गरेको थियो । यो फाउन्डेशन सेन्ट जेभियर्स कलेज पढ्ने पूर्व विद्यार्थी रिचा बजिमयको क्यान्सरका कारण मृत्यु भएपछि उनैको सम्झनामा सन् २००७ मा स्थापना गरिएको संस्था हो ।

“क्यान्सर बिरुद्धको यात्रा” नारालाई जोड दिएको यस र्यालीमा ५ सय भन्दा बढी व्यक्तिहरुले सहभागिता जनाएका थिए । र्यालीमा सहभागीहरुले क्यान्सर मुक्त समाजको लागि एकताबद्ध हुने प्रतिबद्धतासहित उत्साहजनक सहभागिता रहेको थियो ।

र्यालीको उद्घाटन विश्वकै चर्चित साइकल यात्री पुष्कर शाहले गरेका थिए। बिहान ८ बजे सेन्ट जेभियर्सको प्राङ्गणमा भेला भई कार्यक्रम सुरु भएको थियो । थोपा थोपा पानीले समुद्र बन्छ भनेझैँ सबैको स-सानो सहयोगले ठुलो सहयोग हुन्छ भन्दै करिब २५ किलोमिटरको यात्रा सबैले उमङ्गका साथ पार गरेका थिए ।

र्यालीको समापनपछि सबै सहभागीहरुलाई मेडल र प्रमाणपत्र प्रदान गरिएको थियो भने कलेजले आयोजना गरेको जलपान समारोहमा सहभागीहरुको यात्रा अनुभवको बयानले वातावरणलाई रमाइलो र रोमाञ्चक तुल्याएको थियो ।

रिचा बजिमय मेमोरियल फाउण्डेशनलाई आर्थिक सहयोग जुटाउने उद्देश्यले सेट काउन्सिलले साइकल र्यालीको आयोजना गरेको थियो । र्याली सम्पन्न गर्नका लागि कलेजका विद्यार्थी,स्वयंसेवक, कलेज प्रशासन, शिक्षक, स्थानियबासिन्दा तथा अन्य सहयोगीहरुले आआफ्नो क्षेत्रबाट सहयोग र साथ दिएका थिए ।

अगामी बर्षहरुमा पनि यही नारा र प्रसङ्गलाई जोड दिदैँ र्याली आयोजना गर्ने सेट काउन्सिलले जनाएको छ ।