पत्रकार शर्माको निधनको खबरले स्तब्ध छु !

२२ माघ काठमाडौं । वरिष्ठ पत्रकार दुर्गानाथ शर्माको ७२ वर्षको उमेरमा निधन भएको छ । मुटुसम्बन्धी समस्याबाट पीडित शर्माको उपचारको क्रममा बुधबार बिहान ११ बजे मनमोहन अस्पतालमा निधन भएको हो । २४ वर्ष अगाडि उनको ओपन हार्ट सर्जरी गरिएको थियो ।

मुटुमा सङ्क्रमण देखिएपछि उहाँलाई गङ्गालाल अस्पतालमा भर्ना गरिएको थियो । पाँच दिन गङ्गालालमा उपचार गरी उनलाई मङ्गलबार राति ८ बजेमात्र मनमोहन अस्पतालमा भर्ना गरिएको थियो ।

मनमोहन अस्पतालमा भेन्टिलेटरमा राखेर उपचार गर्ने क्रममा उनको निधन भएको हो । २००४ सालमा इलाममा जन्मिनु भएका शर्मा लामो समयसम्म नेपाल टेलिभिजनमा कार्यरत थिए । गोरखापत्रबाट पत्रकारिता सुरु गरेका शर्मा रेडियो नेपालको समाचारवाचक हुँदै नेपाल टेलिभिजनको महाप्रबन्धक भएका थिए ।

शर्माले नेपाल प्रेस इन्स्टिच्युटले प्रकाशन गरेको ‘प्रसारण पत्रकारिता हाते किताब’को सम्पादन पनि गरेका छन् । यसै बिच नेपाली कांग्रेसका नेता गगन थापाले पत्रकार दुर्गानाथ शर्माको निधनको खबरले स्तब्ध भएको बताएका छन् ।

बुधबार दिउँसो शर्माको निधनको खबर थाहा पाए लगतै सामाजिक सञ्जालमा एक स्टाटस पोष्ट गर्दै पत्रकारिता क्षेत्रमा शर्माको क्रियाशीलतालाई सबैले सम्झिरहने छौं, भन्दै हार्दिक श्रद्धाञ्जली व्यक्त गरेका छन् ।