ग्लोबल आइएमई बैंकले कमायो २ अर्ब १४ करोड

२६ माघ, काठमाडौं । ग्लोबल आइएमई बैंक लि.ले चालु आर्थिक वर्षको दोस्रो त्रैमाससम्ममा रु. २ अर्व १४ करोड खुद मुनाफा आर्जन गर्न सफल भएको छ ।

उक्त मुनाफामा साविकको जनता बैंक नेपाल लि.को २०७६ मंसिर १९ सम्मको मुनाफा समेत समावेश भएका बैंकले जनाएको छ । ग्लोबल आइएमई बैंक र जनता बैंक नेपाल एक आपसमा गाभिई गत मंसिर २० गतेदेखि एकिकृत कारोबार शुरु भएको थियो ।

मर्जर पश्चात् ग्लोबल आइएमई बैंक पूँजीको हिसाबले नेपालकै ठूलो बैंक बनेको छ । हाल बैंकको प्राथमिक पूँजी रु. २४ अर्ब ८७ करोड, कुल पूँजी रु. २८ अर्ब १६ करोड, कुल निक्षेप रु. २ खर्ब १३ अर्ब र कर्जा तथा ऋण लगानी रु. १ खर्ब ९८ करोड भन्दा बढी पुगेको छ ।

बैंकले हाल देश तथा विदेशमा रहेका आफ्ना ८१७ शाखा तथा सेवा संजालमार्फत १९ लाख भन्दा बढी ग्राहकलाई सेवा प्रदान गर्दै आएको छ । हाल बैंकले २७० शाखा, २५७ एटीएम, ३८ एक्सटेन्सन काउण्टर तथा राजश्व संकलन काउण्टर र २४९ शाखारहित बैंकिङ्ग सेवामार्फत देशका ७० वटा जिल्लामा सेवा प्रदान गरिरहेको र यसै आर्थिक वर्षमा खोलिने थप ५९ शाखासहित देशका ७७ वटै जिल्लामा सेवा विस्तार गर्ने योजना रहेको बैंकले जानकारी दिएको छ ।