फ्रान्समा आँधी र हुरिबतास : करिब ९० हजार घर अन्‍धकार

२८ माघ एजेन्सी । आइतबार बिहानदेखि चलेको आँधी र हुरिबतासले फ्रान्समा करिब ९० हजार घर अँध्यारो बनेका छन् । सियरा नाम राखिएको यो हुरिबतासले सयौं बिजुलीका पोल ढालिदिएपछि बिजुली गएको हो ।

प्रतिघण्टा १६० किलोमिटरसम्मको गतिमा आएको आँधी र हुरिबतासले फ्रान्सको ब्रतान्य, नोरमदी, काले, ओत द फँसलगायतका ठाउँमा ठूलो क्षति पुर्‍याएको छ । आँधीका कारण केहीठाउँमा स्कुल बन्द गरिएको छ । आँधी र हुरिबताससँगै परेको पानीले थुप्रै भाग डुबाएको छ ।

अकस्मात परेको पानीले बाढी ल्याउँदा थुप्रै ठाउँमा सवारी साधनहरु डुबेका छन् । हुरिबतासकै कारण नोरमदी, बुलोन्य, ओ द फँस र कालेलगायतका ठाउँमा सार्वजनिक रेल सुविधा अवरुद्ध भएका थिए ।

चार हजार मानिसहरु आँधी र हुरिबतासले उद्योग तथा कलकारखानामा पार्न सक्ने क्षतिको निगरानी गर्न खटिएका थिए ।फँस आँफोका अनुसार हिजो बिहानदेखि आएको आँधी र हुरिबतासले पोल्यान्‍डमा दुई र बेलायतमा एक जनाको ज्यान लिएको छ । थुप्रै मानिस घाइते बनेका छन् ।

फ्रान्सका प्रमुख ९६ डिपार्टमेन् मध्ये फ्रन्सको जल तथा मौसम विभागले ११ वटा डिपार्टमेन्ट बाहेक अन्यले सहीसूचना दिन नसकेको भन्दै फ्रान्सेली मिडियाहरुले आलोचना गरेका छन् । सुरक्षाका हिसाबले फ्रान्सलाई हाल पहेंलो अर्थात् सतर्कताको सूचीमा राखिएको छ ।