कांग्रेसविरुद्ध रणनीति बनाउँदै ओली-प्रचण्ड

२८ माघ, काठमाडौं । प्रमुख प्रतिपक्षी दल नेपाली कांग्रेसले अख्तियार दुरुपयोग अनुसन्धान आयोग सत्ताबाट प्रभावित भएको आरोप लगाउँदै संसद् अवरुद्ध गर्न थालेपछिको रणनीति तयार गर्न आज बिहान नेकपाका दुई अध्यक्षबीच छलफल भएको छ ।

प्रधानमन्त्री समेत रहेका केपी शर्मा ओलीको सरकारी निवास बालुवाटारमा बिहान लञ्चसहित वार्ता भएको हो । बालुवाटार निकट स्रोतका अनुसार मन्त्रिपरिषद बैठक लगत्तै ओली र पुष्पकमल दाहाल प्रचण्डबीच भेटघाट भएको थियो ।

नेपाली कांग्रेसले सत्ताको प्रभाव अख्तियारमा पारेको आरोप लगाएको सन्दर्भमा कसरी जाने भन्नेबारे छलफल भएको बताइएको छ । साथै मन्त्रिपरिषदले नीतिगत निर्णय गरेको भन्दै पूर्व प्रधानमन्त्रीद्वय माधवकुमार नेपाल र डा. बाबुराम भट्टराईलाई उन्मुक्ति दिएको विषयमा पनि कुराकानी भएको स्रोतको दावी छ ।

यसबारे निकट कानून व्यावसायीसँग छलफल गर्नु आवश्यक रहेको सन्दर्भमा समेत दुबै अध्यक्ष सहमत भएका थिए । साथै, पार्टी एकीकरणबा बाँकी काम तत्काल गर्न सचिबालय बैठक बोलाउन महासचिव विष्णु पौडेललाई अह्राउन अध्यक्षद्वय सहमत भएका छन् ।

यसैगरी पूर्व माओवादीले मनाउँदै आएको जनयुद्ध दिवसमा यस पटक प्रधानमन्त्री ओलीसमेत सहभागी हुने भएका छन् । यसबारे आज प्रचण्डसँग सहमति जनाएका हुन् । हरेक वर्ष फागुन १ लाई पूर्व माओवादीले जनयुद्ध दिवसका रुपमा मनाउने गरेको छ । विगतमा प्रधानमन्त्री ओलीले माओवादीको जनयुद्धलाई हिंसा दिवस भन्ने गर्थे ।