घाँटी थिचेर पूर्वसचिव कार्कीकी पत्नीको हत्या भएको पुष्टि

२८ माघ काठमाडौं । पूर्वसचिव अर्जुन कार्कीकी पत्नी मुना कार्कीको घटनाको अनुसन्धानमा संलग्न प्रहरी उच्च स्रोतका अनुसार उनको घाँटी थिचेर हत्या गरिएको पुष्टि भएको छ ।

ललितपुर उपमहानगरपालिका–२, सानेपास्थित घरमा सोमबर बिहान अचेत अवस्थामा भेटिएकी कार्कीलाई उपचारका लागि स्टार अस्पताल पुर्‍याइए पनि अस्पतालले पहिले नै मृत्यु भइसकेको बताएको थियो । प्रहरी उच्च स्रोतका अनुसारकामदार विजय चौधरीको पनि झुण्डिएकै कारण मृत्यु भएको देखिएको छ ।

पोस्टमार्टममा संलग्न चिकित्सकहरुका अनुसार कार्कीको मृत्युको कारण स्ट्रांगुलेसन ‘घाँटी थिचिएका कारण’ हो । महानगरीय प्रहरी परिसर ललितपुरले कार्कीको घाँटीमा डोरीले कसेर र टाउकामा पिर्काले हानेर हत्या गरी कामदार चौधरीले आत्महत्या गरेको यसअघि नै दाबी गर्दै आएको छ ।

प्रहरी स्रोतका अनुसार कार्कीको हत्या पछि चौधरीले आत्महत्या गरेको स्पष्ट भइसकेका कारण घटना हुनुको पछाडिको कारण पहिलाउने तर्फ अनुसन्धान केन्द्रित गरिएको छ ।