संसदीय समिति बैठकमा पत्रकारलाई रोक

२ फागुन काठमाडौं । सञ्चारकर्मीहरुप्रति नकारात्कम सोच र शैली अपनाउन उद्यत् वर्तमान केपी ओली सरकारको छाया व्यवस्थापिका संसद्मा समेत पर्न थालेको छ । आज दुईवटा संसदीय समिति बैठकमा पत्रकार तथा सञ्चारकर्मीलाई प्रवेशमा रोक लगाइएको छ ।

कृषि सहकारी तथा प्राकृतिक स्रोत समिति र राज्य व्यवस्था तथा सुशासन समितिको आज बोलाइएको बैठकमा पत्रकारलाई प्रवेशमा रोक लगाइएको छ । विहान सुरु भएको कृषि तथा प्राकृतिक स्रोत समितिको बैठकमा समाचार संकलनका लागि भित्र पसेका सञ्चारकर्मीहरुलाई बाहिर निकालिएको थियो ।

समितिको आन्तरिक छलफल गर्नु पर्ने भएकाले सञ्चारकर्मीहरुलाई बाहिर गइ दिन आग्रह गर्दछु भन्दै समिति सभापति पूर्ण सुवेदीले सञ्चारकर्मीलाई बाहिर पठाएकी थिइन् । आजको समिति बैठकमा अन्तर्देशीय उर्जा सम्मेलनबारे छलफल गर्ने कार्य सूचि तयार गरिएको छ ।

समिति बैठकमा उर्जा मन्त्री , सचिव र लगानी बोर्डका कार्यकारी निर्देशकलाई आमन्त्रण गरिएको छ । यसैगरी आजैका लागि डाकिएको राज्य व्यवस्था तथा सुशासन समितिमा समेत पत्रकारहरुलाई प्रवेश रोक लगाइएको छ । वैठकमा नेपाली सेनामा भइरहेको भ्रष्टार तथा अनियमितताबारे छलफल गर्ने कार्य सूचि तय भएको छ ।