विभिन्न स्थानबाट लागूऔषधसहित ३ जना पक्राउ

४ फागुन काठमाडौं । बाँके, नेपालगंज उपमहानगरपलिका-१५ स्थितबाट अवैध लागूऔषध ब्राउनसुगर करिब १ ग्राम सहित जुम्ला चन्दननाथ नगरपालिका-४ बस्ने ३० वर्षीय योगेन्द्र मल्ल र ३० वर्षीय हरि थापालाई शनिबार बिहान प्रहरीले पक्राउ गरेको छ । ईलाका प्रहरी कार्यालय जमुनाह र लागूऔषध नियन्त्रण ब्यूरो नेपालगंजबाट खटिएको प्रहरीले रुपैहडियाबाट नेपालगंजतर्फ आउँदै गरेका उनीहरुलाई जाचँ गर्ने क्रममा उक्त परिमाणको लागूऔषध फेला पारी पक्राउ गरेको हो ।

मकवानपुर, हेटौंडा उपमहानगरपालिका-१९ नेवारपानीबाट अवैध लागूऔषध गाँजा करिब ३३ केजी ६ सय ग्रामसहित भारत पश्चिम चम्पारण वेतिया गैरीकोट बस्ने ४० वर्षीय भगवान यादवलाई शनिबार बिहान प्रहरीले पक्राउ गरेको छ । ईलाका प्रहरी कार्यालय नेवारपानीबाट खटिएको प्रहरीलाई देख्नासाथ मनहरीबाट हेटौंडातर्फ जाँदै गरेको जेएच ०९ ए ८३६१ नम्बरको कार रोकी कारमा सवार ५ जना व्यक्तिहरु भाग्ने क्रममा उनीहरुमध्ये यादवलाई प्रहरीले पक्राउ गरेको हो । साथै उक्त कार जाँच गर्दा कारको सिटमुनी टायरभित्र लुकाई छिपाई राखेको उक्त परिमाणको लागूऔषध फेला पारेको हो । तत्काल फरार रहेका अन्य ४ जनाको प्रहरीले खोजी गरिरहेको छ ।

यसैगरी मकवानपुर, हेटौंडा उपमहानगरपालिका-१९ नेवारपानीबाट अवैध लागूऔषध गाँजा करिब २ केजी ७ सय ग्राम शुक्रबार बिहान प्रहरीले बरामद गरेको छ । ईलाका प्रहरी कार्यालय नेवारपानीबाट खटिएको प्रहरीले चितवनबाट हेटौंडातर्फ जाँदै गरेको लु.२ ख ३ नम्बरको बस जाँच गर्ने क्रममा बसको पछाडीको सिटमुनी झोलाभित्र उक्त लागूऔषध लुकाई छिपाई राखेको अवस्थामा फेला पारी बरामद गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।