बदेलको मासुसहित भरुवा बन्दुक बरामद

५ फागुन कैलाली । गौरीगंगा नगरपालिका-६ दैधबारी बारवन साझेदारी सामुदायिक वनबाट प्रहरीले एकनाल भरुवा बन्दुक र बदेलको मासु आइतबार बिहान बरामद गरेको छ ।

उक्त ठाउँमा भरुवा बन्दुक रहेको खबर प्राप्त हुनासाथ ईलाका प्रहरी कार्यालय चौमालाबाट खटिएको प्रहरीले उक्त मासु र भरुवा बन्दुक बरामद गरेको हो । यस सम्बन्धमा प्रहरीले थप अनुसन्धान गरिरहेको छ ।

सुनको ब्रासलेट तथा मोबाइल लुटपाट

कागेश्वरी मनहरा नगरपालिका-९ सुन्दरीचोकबाट सोही ठाउँ बस्ने सुनसरी घर भएकी २० वर्षीया कान्ती कडरीयाको हातमा लगाएको सुनको ब्रासलेट १ थान र मोबाइल १ थान समेत गरी करिब १ लाख १५ हजार रुपैयाँ बराबरको धनमाल आइतबार राति लुटपाट भएको छ ।

अपरिचित ३ जना व्यक्तिहरुले उक्त लुटपाट गरी फरार भएको भन्ने खबर प्राप्त हुनासाथ महानगरीय प्रहरी प्रभाग काँडाघारीबाट खटिएको प्रहरीले यस सम्बन्धमा आवश्यक अनुसन्धान गरिरहेको छ ।

विभिन्न धनमाल चोरी

काठमाडौं महानगरपालिका-३२ खहरे चोकस्थित सान पार्टी प्यालेसमा विवाहको लागि बुटवलबाट जन्ती आएकी ३५ वर्षीया ओम कुमारी क्षेत्रीको करिब ३ लाख ६ हजार रुपैयाँ बराबरका सुनका विभिन्न गहनाहरु भएको ब्याग आइतबार राति चोरी भएको छ ।

ललितपुर, ललितपुर महानगरपालिका-१८ बालकुमारी गोलढोका बस्ने राजन प्रजापतीको घरबाट आइतबार दिउँसो कोही नभएको अवस्थामा करिब ४ लाख ५० हजार रुपैयाँ बराबरका सुनका विभिन्न गहनाहरु र नगद ४५ हजार रुपैयाँ समेत गरी करिब ५ लाख रुपैयाँ बराबरको धनमाल चोरी भएको छ ।  चोरीमा संलग्न व्यक्तिहरुको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको छ ।