एमसीसी सम्झौतामा फेरबदल गर्न समय घर्किसक्यो

६ फागुन काठमाडौं । सत्ताधारी दल नेपाल कम्युनिस्ट पाटी नेकपाभित्र विवादित बनेको अमेरिकी सहयोग सम्बन्धी सम्झौता एमसीसी कम्प्याक्टमा अहिले आएर कुनै संशोधन हुन नसक्ने अमेरिकी राजदूत यान्डी बेरीले बताएका छन् ।

मङ्गलवार बीबीसी नेपालीसँग विशेष कुराकानी गर्दै राजदूत बेरीले उक्त सम्झौता टुङ्गोमा र्पुयाउन पाँच वर्षसम्म दुई देशबीच कुराकानी भएको बताएका हुन् । राजदूत बेरीका अनुसार सन् २०१२ देखि सन् २०१७ को पाँच वर्ष अवधिमा यो सम्झौताका अन्तरवस्तुहरूबारे कैयन चरणमा छलफल भएका थिए । ती सबै सन् २०१७ मा नेपाल सरकार र अमेरिकी सरकारले हस्ताक्षर गरेपछि निष्कर्षमा टुङ्गिएका हुन् ।

बीबीसी नेपाली सेवासंग कुराकानी गर्दै उनले भनेका छन् , त्यही विन्दुमा हामीले सम्झौताका सर्तहरू स्वीकार गरेका थियौँ । अहिले अढाइ वर्षपछि जब यसको वास्तविक कार्यान्वयन नजिक आइरहेको छ तब संशोधनका छलफलका लागि त समय घर्किसकेको छ । अहिले त्यतिखेर नेपाल सरकार र अमेरिकी सरकारले स्वीकार गरेको सम्झौता लागु गर्ने विषयमा छलफल भइरहेको उनले बताए । सत्ताधारी दलभित्र एमसीसीबारे विवाद उब्जिएपछि त्यसबारे अध्ययन गर्न गठित कार्यदलले काम गर्दै गर्दा अमेरिकी राजदूतको यस्तो भनाइ आएको छ ।

उनले एमसीसीले नेपालको विकासका लागि ठूलो योगदान र्पुयाउन सक्ने भन्दै त्यसका पछाडि कुनै लुकेका एजेन्डा नभएको बताएको बीबीसीमा उल्लेख छ । एमसीसीलाई अमेरिकाले हालसालै अघि सारेको इन्डो प्यासिफिक रणनीति (आइपीएस)को अङ्ग भएको भन्दै कतिपयले नेपाल कुनै पनि विदेशी सैनिक रणनीतिको पाटो बन्न नहुने भनेर चर्चा गरेका छन् ।तर राजदूत बेरीले भने नेपालले हस्ताक्षर गरेको एमसीसी सम्झौता र इन्डो प्यासिफिक रणनीति बिल्कुल फरक विषय भएको बताएको समाचारमा उललेख गरिएको छ ।

अमेरिका-नेपाल सम्बन्धमा असर पर्दैन

एमसीसी अनुसार अमेरिकाले पाँच वर्षमा झन्डै ६० अर्ब रुपैयाँ नेपालको विशेषगरी अन्तरदेशीय विद्युत प्रसारण लाइन विकासको लागि अनुदान दिने उल्लेख छ । सोही समयभित्र नेपाल सरकारले चाहिँ ती पूर्वाधार विकासमा आफ्नोतर्फबाट करिब १५ अर्ब रुपैयाँ खर्च गर्नु पर्नेछ ।

मिलेनियम च्यालेन्ज सम्झौता (कम्प्याक्ट) लाई प्रतिनिधिसभामा अनुमोदनका निम्ति दर्ता गरिएको सात महिनाभन्दा धेरै भइसकेको छ । सरकारले यही अधिवेशनमा एमसीसी अनुमोदन हुने बताइरहेको छ । तर अहिले आएर यसका बारे उठेका विवादले कतै यो सम्झौता लागु नहुने हो कि भन्ने संशय पनि उत्पन्न भएका छन् ।

त्यस्तो भएमा नेपाल-अमेरिका सम्बन्धमा असर पर्न सक्ने आकलन पनि कतिपयको छ । एमसीसी सम्झौताको कार्यान्वयन आगामी जुन महिनाभित्र सुरु हुनुपर्ने समयतालिका छ । स्मरण रहोस अमेरिकी राजदूतसँगको अन्तर्वार्ता बुधवार साँझ बीबीसी नेपाली सेवामा प्रसारण हुनेछ । बीबीसी