कांग्रेसद्धारा राष्ट्रियसभा बैठक अवरुद्ध, बास्कोटालाई बर्खास्त गर्न माग

८ फागुन काठमाडौं । प्रमुख प्रतिपक्षी नेपाली कांग्रेस बिहीबारको राष्ट्रियसभा बैठक अवरुद्ध गरेको छ । सञ्चार तथा सूचनाप्रविधिमन्त्री गोकुल बास्कोटालाई बर्खास्त गर्न माग गर्दै कांग्रेसले राष्ट्रियसभा बैठक अवरुद्ध गरेको हो ।

बिहीबार बिहान सेक्युरिटी प्रिन्टिङ प्रेस खरिदका लागि स्वीस एजेन्टसँग भएको कुराकानीको अडियो सार्वजनिक भएपछि यो समाचारको बिषयले चर्चा पाएको छ । सार्वजनिक भएको अडियोमा सञ्चारमन्त्री बास्कोटाले कमिसनबारे कुराकानी गरेका थिए । अडियोको संवाद सुन्दा एजेन्टले मन्त्रीलाई ५४ र ५५ करोड आउने बताएका छन् ।

राष्ट्रियसभाको बिहीबारको बैठक सुरु हुनासाथ नेपाली कांग्रेसका सांसद जीतेन्द्र देवले मन्त्रीलाई बर्खास्त गरेर छानविन गर्नुपर्ने माग गरे । साथै यसबारे प्रधानमन्त्री केपी शर्मा ओलीले राष्ट्रियसभालाई जवाफ दिनुपर्ने उनको माग छ । लगतै कांग्रेस सांसदहरु आ आफ्नो स्थानमा उभिएर राष्ट्रियसभा बैठक अवरुद्ध गरेका छन् ।अर्को बैठक १५ फागुनमा बस्नेछ ।