सञ्चारमन्त्री बाँस्कोटालाई विमानस्थलमा कालोझण्डा, नेविसंघका एक नेता पक्राउ

८ फाल्गुण, काठमाडौं । नेपाल विद्यार्थी संघका कार्यकर्ताले संचारमन्त्री गोकुल बाँस्कोटालाई विमानस्थलमा कालोझण्डा देखाएका छन् ।

कञ्चनपुरबाट राजधानी फर्कदै गर्दा मन्त्री बाँस्कोटालाई त्रिभुवन अन्तर्राष्ट्रिय विमानस्थलमा कालो झण्डा देखाएको नेविसंघका महामन्त्री दीपक भट्टराईले जानकारी दिए । कालो झण्डा देखाउने क्रममा नेविसंघका नेता विष्णुहरी खड्कालाई प्रहरीले पक्राउ गरेको छ । नेविसंघले संचारमन्त्रीले राजीनामा नदिएसम्म प्रतिरोधमा उत्रने जनाएको छ ।

सेक्युरिटी प्रेस खरिदबारे विदेशी कम्पनीका एजेन्टसँग कमिसन मागेको अडियो सार्वजनिक भएपछि उनको विरोध गर्दै नेविसंघका कार्यकर्ताले कालो झण्डा देखाएका हुन् ।