प्रेस सल्लाहाकारको गाडीमा बाँस्कोटा बालकोटमा, सञ्चार मन्त्रालयमा अख्तियारको छापा

८ फाल्गुण, काठमाडौं । अख्तियार दुरुपयोग अनुसन्धान आयोगले निवर्तमान सञ्चारमन्त्री गोकुल बाँस्कोटाको निजी सचिवालयमा आज सॉझ छापा मारेर बाँस्कोटाका सम्पूर्ण कागजपत्र जफत गरी सिलबन्दी गरेको खबर छ । उनी प्रधानमन्त्री केपी ओलीको निजी निवास बालकोटमा बस्दै आएका छन् ।

कमिसनसम्बन्धी लेनदेनको अडियो प्रकरणमा मुछिएपछि सञ्चार तथा सूचना प्रविधिमन्त्रीबाट राजीनामा दिएका बाँस्कोटाले लोकतन्त्रमा कुनैपनि व्यक्तिका कारण आन्दोलन गर्नुपर्ने र संसद घेर्नुपर्ने अवस्था आउन नहुने बताएका छन् । आफ्नो कारणले संसद नघेरियोस् र आन्दोलन नहोस् भनेर आफूले राजीनामा दिएको प्रतिक्रिया दिएका बाँस्कोटाले झण्डावाल गाडी र अंगरक्षक प्रधानमन्त्री निवास बालुवाटारमै छाडेर घर फर्केका हुन् ।

गाडीविहीन भएका बाँस्कोटालाई प्रधानमन्त्रीका प्रेस सल्लाहकार सूर्य थापाले आफ्नो गाडीमा राखेर बालकोट र्पुयाएका छन् । काभ्रे पुर्ख्यौली थलो रहेका बाँस्कोटा प्रधानमन्त्री ओलीको बालकोटस्थित निवासमा बस्दै आएका छन् । त्रिभुवन अन्तर्रा्ष्ट्रिय विमानस्थलमा ओर्लने बित्तिकै बाँस्कोटा प्रधानमन्त्री ओलीलाई भेट्न बालुवाटार पुगेका थिए । अपरान्ह ४ बजेर ८ मिनेटमा ट्वीट गर्दै बाँस्कोटाले नैतिकताका आधारमा राजिनामा दिएको बताएका छन् ।

उनले ट्वीटमा आफ्नो बारेमा प्रश्न उठेकोले सम्माननीय प्रधानमन्त्रीज्यू समक्ष नैतिकताको आधारमा मन्त्री पदबाट राजीनामा दिएको लेखेका छन् । उनको राजीनामासँगै हरेक विहीवार हुने नियमित पत्रकार सम्मेलन स्थगित भयो । उनी हिजोमात्र गोरखापत्रको कोहलपुर संस्करण शुभारम्भ लगायत कार्यक्रमका लागि राजधानीबाहिर गएका थिए ।

ओली प्रधानमन्त्री भएपछि २०७४ चैत २ मा बाँस्कोटालाई सञ्चार राज्यमन्त्री नियुक्त गरेका थिए । त्यतिबेलासम्म बाँस्कोटालाई चिन्ने मान्छे निकै कम थिए । तीन महिनापछि ओलीले आफ्ना विश्वासपात्र बाँस्कोटालाई सञ्चार मन्त्रालय हाँक्ने जिम्मेवारी दिएका थिए । २०७५ जेठ १८ गते सञ्चार मन्त्री भएका बाँस्कोटाले सरकारको प्रवक्ताका रूपमा पनि जिम्मेवारी पाए ।

२०७४ सालमा भएको निर्वाचनमा काभ्रे प्रतिनिधिसभा क्षेत्र नम्बर २ बाट बाँस्कोटा विजयी भएका थिए । उनी केपी शर्मा ओलीपछि सबैभन्दा बढी मत ल्याएर सांसद बनका हुन् । प्रधानमन्त्रीका प्रेस सल्लाहकार सूर्य थापाका अनुसार अब अर्को सातामात्र मन्त्रिपरिषदका निर्णय सार्वजनिक हुने भएको छ ।

यता सेक्युरिटी प्रिन्टिङ प्रेस खरिदको विषय विवादमा परेको भन्दै संसद्को सार्वजनिक लेखा समितिले त्यससम्बन्धी सबै प्रक्रिया तत्कालका लागि स्थगित गर्न सरकारलाई निर्देशन दिएको छ । उक्त प्रेस खरिदको विषयमा सरकारका प्रवक्ता एवं सञ्चारमन्त्री बाँस्कोटासँगै स्वयं सार्वजनिक लेखा समिति पनि विवादमा परेपछि सो समितिले यस्तो निर्णय गरेको हो ।

यसैबिच निवर्तमान सञ्चार तथा सूचना प्रविधिमन्त्री गोकुल बाँस्कोटाले आफ्नो निवास बालकोट पुगेर सुभचिन्तकबीच अडियो प्रकरणबारे बोलेका छन्। बिहीबार दिउँसो प्रधानमन्त्री केपी शर्मा ओलीलाई बाँस्कोटाले राजीनामा बुझाएर साँझ बालकोट पुगेका बाँस्कोटाले यस विषयमा बोलेका हुन्। कमिसन मागेको अडियो सार्वजनिक भएपछि उनले नैतिकताको आधारमा राजीनामा दिएको उल्लेख गरेका छन्। एउटा राजनीतिक मान्छेमाथि प्रश्न उठेपछि ठ्याक्क राजीनामा दिएको उनको भनाइ छ।

‘जब प्रश्न उठ्यो, ठीक होला बेठीक होला, सत्य होला, असत्य होला एनिमेसन होला, के–के होला, सातवटा जोडेर अडियो बनाएको होला, सही होला वा नहोला, त्यो बेग्लै चिज हो’, बाँस्कोटाले भने, ‘तर, जब एउटा पोलिटिकल मान्छेलाई प्रश्न उठ्छ, उसले यसमा अप्ठ्यारो मान्नु नै हुँदैन, ढ्याक्क राजीनामा दिने हो।’ बाँस्कोटाले यस विषयमा अख्तियार दुरुपयोग अनुसन्धान आयोग, नेपाल प्रहरीको केन्द्रीय अनुसन्धान ब्यूरो, संसद र पार्टीले छानबिन गरेर सत्यतथ्य स्पष्ट पार्ने बताएका छन्।