एमसीसी पारित गर्न ओलीलाई हम्मे

१० फागुन, काठमाडौं । बहुचर्चित अमेरिकी सहयोग मिलेनियम च्यालेञ्ज कर्पाेरेशन कम्प्याक्ट (एमसीसी) अनुमोदन गर्न नेपाल कम्युनिष्ट पार्टी (नेकपा) अध्यक्षसमेत रहेका प्रधानमन्त्री खड्गप्रसाद ओलीका लागि फलामकै चिउरा चपाए सरह हुने भएको छ ।

उक्त प्रस्ताव अनुमोदनका लागि सभामुख अग्निप्रसाद सापकोटालाई संसद्मा प्रस्ताव पेश गर्न ओलीले दवाब दिइरहेका बेला अध्ययन कार्यदलले परिमार्जनसहित पास गर्न सुझाव दिएपछि याे विषय अाेलीका लागि भालुको कन्पट बनेको हाे । हिजो मात्रै तीन सदस्य (झलनाथ खनाल, भीम रावल र प्रदिपकुमार ज्ञवाली) नेतृत्वको कार्यदलले एमसीसीमा परिमार्जन अपरिहार्य रहेको भन्दै अध्यक्षद्वय ओली र पुष्पकमल दाहाल प्रचण्डलाई प्रतिबेदन बुझाएको छ ।

साढे दुई वर्ष अघि नै कार्यान्वयनमा आइसकेको यो परियोजनामा दुई अर्ब रुपैयाँ भन्दा बढी खर्च भइसकेको छ । अब नयाँ शर्तसहित परियोजना अगाडि बढाउन सहज नहुने बुझ्दा बुझ्दै खनाल नेतृत्वको कार्यदलले प्रतिवेदन दिएपछि ओलीलाई अफ्ठेरो परेको छ ।

उता, यसै सन्दर्भमा अर्का अध्यक्ष पुष्पकमल दाहाल ‘प्रचण्ड’ले आज नवलपुरमा आयोजित एक कार्यक्रममा एमसीसी बाइबल नभएको भन्दै यसमा परिमार्जन गरिने अभिव्यक्ति दिएका छन् । उता, नेपालका लागि अमेरिकी राजदूत ¥याण्डी बेरीले भने एमसीसी बिना शर्त अनुमोदन गरिए मात्र नेपालले सहयोग पाउने अन्यथा सहयोग गर्न नसकिने यस अघि नै बताएका छन् ।

शारिरीक रुपमा सशक्त नरहेका प्रधानमन्त्री ओली पार्टी भित्रको पेचिलो अवस्थाले झन आजित भएका छन् । अहिले चौतर्फी घेराबन्दीमा परेको अनुभव गरिरहेका प्रधानमन्त्री ओलीले एमसीसीलाई कसरी पारित गराउने हुन् भन्ने चासो सर्वत्र बढेको छ ।