आर्मी हेडक्वार्टर बनाएको भुक्तानी नपाएपछि पीडितहरु आन्दोलनमा

१३ फागुन, काठमाडौं । दुई बर्ष नौ महिना समय लगाएर भद्रकालीमा रहेको सैनिक हेडक्वार्टर बनाएको भुक्तानी नपाएपछि पीडितहरुले आन्दोलन गरेका छन् । हेडक्वार्टर असारदेखी संचालनमा आएको भएपनि पेटी ठेकेदार र कामदारले भने अहिलेसम्म भुक्तानी पाउन सकेका छैनन् ।

पटकपटक आग्रह गर्दा समेत काम गरेको भुक्तानी नपाएपछि आन्दोलन गर्नुपरेको पीडित पेटी ठेकेदार रमेश शिवाकोटीले नेपालबहस डटकमलाई बताए । करिब एक हजार मजदुरहरुको २० देखि २५ करोडसम्म भुक्तानी बाँकी रहेको पनि शिवाकोटीले बताए ।

शिवाकोटीका अनुसार उक्त सैनिक हेडक्वार्टर बनाउन राष्ट्रिय पुनर्निर्माण प्राधिकरणले ३ सय ५१ करोडमा केसी कन्ट्रक्सनले ठेक्का पाएको थियो । त्यसपछि केसी कन्ट्रक्सनले कुईष्ट इन्फा प्राइभेट लिमिटेड नामक अर्को कन्ट्रक्सनलाई निमार्ण ठेक्काको जिम्मा दिएको थियो । ठेकेदार कुईष्टले विभिन्न साना ठेकेदारहरुलाई विभिन्न निमार्ण सम्बन्धि कामको जिम्मा दिएको थियो । तिनै साना ठेकेदारहरुले मजदुर लगाएर गरेको कामको अहिलेसम्म भुक्तानी नपाएपछि आन्दोलन गर्नुपरेको उनको भनाई छ ।

पेटी ठेकेदारले अहिलेसम्म कुल लागतको जम्मा २० देखि २५ प्रतिशतसम्म मात्रै भुक्तानी पाएको र बाँकी भुक्तानी नपाएका कारण कामदारलाई भुक्तानी गर्न नपाएको शिवाकोटीले बताए । भुक्तानी नपाएपछि प्रधानसेनापति लगायत मुख्य ठेकेदारसम्मलाई पटकपटक घच्घच्याउने र ज्ञापनपत्र बुझाउँदा समेत आफ्ना समस्याको कुनै सुनुवाई नभएपछि आन्दोलन गर्नुपरेको शिवाकोटीले नेपालबहसलाई बताए । भुक्तानी नपाउँदासम्म आन्दोलन जारी रहने उनको भनाई छ ।

आज बिहानदेखि भद्रकाली मन्दिर छेउमै रहेको सैनिक हेडक्वार्टर अगाडि गरिएको धर्नामा मजदुरदेखि सहायक ठेकेदारहरुको बाक्लो उपस्थिति रहेको छ । आफ्नो भुक्तानी बारे प्राधिकरणलाई जनाकारी गराउदा मुख्य ठेकेदारले सबै रकम लगिसकेको जानकारी दिने गरेपछि आफुहरुले भुक्तानी नपाउँदासम्म आन्दोलन गर्नुको विकल्प नभएको लेबर सप्लाईको जिम्मा लिएर भुक्तानी नपाएका पुरुषोत्तम दाहालको भनाई छ ।

यस विषयमा नेपालबहसले सम्पर्क गर्न खोज्दा केसी कन्ट्रक्सनका संचालक रोशन केसी र कुईष्ट इन्फा प्राइभेट लिमिटेडका संचालक सुमित शाहको मोबाइल बन्द भएको पाइएको छ ।