सकारात्मक ‘सर्किट ब्रेक’ले शेयर किन्न लगानीकर्ता बीच होडबाजी

१३ फागुन, काठमाडौं । उतारचढावका बीच साताको तेस्रो दिन आज पनि धितोपत्र बजारमा चमत्कारिक सुधार देखिएको छ । नेपाल स्टक एक्सचेञ्ज (नेप्से) खुलेको पाँच मिनेटपछि नै दाेस्राे बजार ओह्रालो लाग्न शुरु गरेको थियो । नेप्से झण्डै २६ अंकको गिरावट ल्याउँदै अगाडि बढ्यो । बजार घट्ने छाँटकाँट र आँकलन गर्दा नगर्दै नेप्सेले पुनः ११ः४५ मा १५११ अंक टेक्न पुग्यो । बजार त्यसपछि फेरि केही समय ओह्रालो लयमा लाग्यो । १२ः१८ सम्म १५०० को हाराहारीमा रहेको नेप्सेले त्यसपछि भने उकालो यात्रा सुरु गर्यो ।

उकालो यात्रा कायम राख्दै बढेको नेप्सेले अन्तिमा कारोबार समय ३ बज्दा ४३ दशमलव ०२ बिन्दू कायम गरी लगानीकर्तालाई उत्साहका साथ घर फर्काएको छ । नेप्से आज एक हजार पाँच सय ४५ दशमलव १९ मा पुगेको छ । यस्तै सेन्सेटिभ परिसूचक ८ दशमलव ७५ ले वृद्धि भई तीन सय २६ दशमलव ५६ मा पुगेको छ ।

नेप्सेको उच्च अङ्कको वृद्धिसँगै कारोवार रकममा समेत वृद्धि भएको छ । कूल १८० कम्पनीको ७० लाख ५९ हजार ७१२ कित्ता शेयर रु दुई अर्ब ९९ करोड २१ लाख ६० हजार ५२४ मूल्य बराबरको शेयर कारोवार भयो ।

कारोवार भएका कूल १२ उपसमूहमध्ये आज सबै उपसमूहको शेयर वृद्धि भएको छ । त्यसमा बैंकिङ १२ दशमलव ८९, व्यापार ४७ दशमलव ०९, होटल ११ दशमलव २२, विकास बैंक ४४ दशमलव ४९, जलविद्युत् ४६ दशमलव ५१, वित्त १९ दशमलव ४२, निर्जीवन बीमा ३०७ दशमलव ०९, उत्पादन ११८ दशमलव ४२, अन्य ५१ दशमलव ०३, लघुवित्त ८३ दशमलव ४४, जीवन बीमा ६७३ दशमलव ४९ र सामूहिक लगानी कोष शुन्य दशमलव ०९ ले वृद्धि भउको छ ।

स्टकका अनुसार कारोवारका आधारमा हिमालयन डिस्टिलरी शीर्ष स्थानमा रहेको छ । सो कम्पनीको रु १६ करोड ३३ लाख ५१ हजार १६८ बराबरको कारोवार भई शीर्ष स्थानमा रहेको छ । यस्तै नेपाल लाइफ इन्स्योरेन्स कम्पनी रु १४ करोड ३६ लाख १५ हजार १८२, शिखर इन्स्योरेन्स कम्पनी रु १० करोड ६५ लाख ३४ हजार ३६२, नेको इन्स्योरेन्स रु नौ करोड ४२ लाख ७७ हजार ५७९, एनएमबी बैंक रु नौ करोड ३५ लाख नौ हजार ६६६ र एनआइसी एशिया बैंकको रु नौ करोड सात लाख ५५ हजार ८५७ बराबरको कारोवार भई शीर्ष स्थानमा रहेका छन् ।

नेप्सेका अनुसार गुराँस लाइफ इन्स्योरेन्स, हिमालयन डिस्टिलरी र स्वदेशी लघुवित्त वित्तीय संस्थाका शेयरधनीले १० प्रतिशतले कमाउँदा युनिलिभर नेपाल ९ दशमलव ९९, शिखर इन्स्योरेन्स ९ दशमलव ९८, र लाइफ इन्स्योरेन्स कम्पनीका शेयरधनीले ९ दशमलव ९३ प्रतिशतले कमाए । त्यस्तै दिव्यश्वरी हाइड्रोपावर ३ दशमलव ६३, प्रोगेसिभ फाइनान्स २ दशमलव ६७, रिलायन्स फाइनान्स २ दशमलव ६४, एभरेष्ट बैंक १ दशमलव ९२, एनआइब्एिल प्रगति फण्ड १ दशमलव १७ र पाँचथर पावर कम्पनीका लगानीकर्ताले ० दशमलव ७६ प्रतिशतले गुमाए ।

समग्रमा हेर्दा आजको शेयर कारोबारबाट के कुरा बुझ्न सकिन्छ भने लगानीकर्ता अझै शेयर बजारमा लगानी बढाउन चाहन्छन् । बजारमा शेयर बेच्ने भन्दा किन्नेको चाप अझै केही दिन बढ्न सक्ने देखिन्छ । यदि गएको तीन दिनलाई आधार मान्ने हो भने बजारमा नयाँ लगानीकर्ता र पुराना लगानीकर्ताहरु नै शेयर किन्नका लागि कस्सिएका छन् । यसले बजारमा उत्साह नै थपेको एक ब्रोकरले बताए ।

राम्रो लाभांश र बोनसहरु दिँदै आएका कम्पनीहरुका शेयर किन्नका लागि लागनीकर्ता बीच नै बढीबढाउ मुल्यमा शेयर किन्न हाेडबाजी नै चलेको उनले नेपालबहस डटकमलाई बताए । नेप्से परिसूचक बढेसँगै आज १० कम्पनीको शेयरमूल्यमा सकारात्मक सर्किट ब्रेक लागेको छ । युनिलिभर नेपाल, हिमालयन डिष्टिलरी, स्वदेशी लघुवित्त, गुराँस लाइफ इन्स्योरेन्स, शिखर इन्स्योरेन्स लगायतका कम्पनीहरुमा सकारात्मक सर्किट ब्रेक लागेको हाे ।