सबैको आशा र भरोसाको संवाहक बन्ने छु : चन्द्रप्रसाद ढकाल

१४ फागुन, काठमाडौं । नेपाल उद्योग बाणिज्य महासंघको आगामी चैतमा हुनलागेको ५४ औं महाधिवेशनको मिति नजिकिँदै जादाँ उम्मेद्बारी घोषणाका कार्यहरु धमाधम रुपमा हुदैछन् ।

बुधबार एक कार्यक्रमको आयोजना गरि “समृद्धिको आधार राज्य निजी क्षेत्रको साझेदार” भन्ने नाराका साथ हालका उपाध्यक्ष चन्द्रप्रसाद ढकालले आफ्नो उम्मेद्बारी वरिष्ठ उपाध्यक्षको लागी घोषणा गरेका छन् ।

घोषणा कार्यक्रममा बोल्दै ढकालले सबैको आशा र भरोसाको संवाहक भएर काम गर्ने बताए । संस्थाको गरिमालाई अझ उचाईमा पुर्याउन आफ्नो उम्मेद्बारी रहेको दाबी गर्दै ढकालले भने यही संस्थाकै कारण देशभर घुमेको छु, व्यवसायी साथीहरूका मर्म र भावना बुझेको छु । तिनै मर्म भावना अनुरुप काम गर्न आफ्नो उम्मेद्बारी रहेको ढकालले दाबी गरे । निजी क्षेत्रको बिकास बिना राज्यको समृद्धि सम्भव नभएको हुँदा सरकारसँग मिलेर निजी क्षेत्रको विकासमा सहयोग गर्ने ढकालले प्रतिबद्धता जाहेर गरे ।

नेपाल उद्योग बाणिज्य महासंघलाई ठुला ब्यापारीहरुको मात्रै संस्था भनेर बेलाबेलामा लाग्ने गरेको आरोपको खण्डन गर्दै सबै साना व्यवसायीहरुलाई समेत समेटेर लैजान आफ्नो उम्मेद्बारी रहेको उनको दाबी थियो । उधोगी र राज्यको बीचमा बसेर आफुले काम गर्ने भन्दै राज्यले समेट्न नसकेका नीतिगत कुराहरुमा समेत सल्लाह सुझाव गर्दै अगाडि बढ्ने प्रतिबद्धता समेत व्यक्त गरे ।

राज्यले उधोगीहरुलाई बिजुली सहुलियत, उद्योग खोल्ने जग्गाको उचित मुआब्जाको ब्यबस्था लगायतमा सहजीकरण गर्न सके देशमा अझै उद्योगधन्दा फस्टाउने भन्दै यी र यस्तै नीतिगत निर्णयको लागि सरकारसँग सहकार्य गरेर अगाडि बढ्ने उनले प्रतिबद्धता व्यक्त गरे ।

राज्यको नीतिलाई सहयोग पुग्ने, धेरै भन्दा धेरै जनतालाई फाइदा पुग्ने र ब्यबसाय नाफामुलक भन्दा पनि दिगो हुनुपर्ने यी तीन सिद्धान्तमा रहेर व्यवसाय गर्दा आफू आज यो स्थानमा आएको अनुभव सुनाउने ढकाल आइएमइ रेमिटेन्सका संस्थापक हुन् ।