बामदेवबारे टुंगो लगाउन नेकपा सचिवालय बैठक फेरि बस्यो

१८ फाल्गुण, काठमाडौं । सत्तारुढ नेकपाभित्र बामदेव प्रकरणले रडाको मच्चिइरहेका बेला अहिले त्यही सन्दर्भलाई लिएर सचिवालय बैठक बसिरहेको छ । पार्टी अध्यक्षसमेत रहेका प्रधानमन्त्री केपी ओलीको सरकारी निवास बालुवाटारमा जारी बैठकले गत बुधबार गरेको निर्णय कार्यान्यवयनको विषयमा छलफल गर्दैछ ।

पर्सी फागुन २० गतेदेखि रिक्त हुने राष्ट्रियसभाको एक सदस्यको पूर्ति गर्न सचिवालय बैठकले बामदेव गौतमको नाम अघि सारेको थियो । तर प्रधानमन्त्री ओली भने अर्थमन्त्री डा. युवराज खतिवडालाई नै निरन्तरता दिन चाहन्छन् । यही विषयलाई लिएर पार्टीभित्र दुईधारले रस्साकस्सी गरिरहेको छ ।

यही विषयलाई लिएर पार्टीका अर्का अध्यक्ष पुष्पकमल दाहाल ‘प्रचण्ड’ र ओलीबीच टकरावको स्थिति आएको छ । पार्टी सचिवालय बैठकको निर्णय कार्यान्वयन हुनुपर्ने अडान ओली र ईश्वर पोखरेल बाहेक प्राय सबै नेताको रहेको छ । यो प्रकरणलाई मत्थर बनाउन पार्टीका अर्का नेता माधवकुमार नेपालले राम्रै दौडधूप गरेका छन् ।

बामदेवलाई राष्ट्रियसभामा लगेर कुनै उपलव्धि नहुने तर्क माधव पक्षकै कतिपय नेताहरुले बोल्न थालेका छन् । माधव निकट नेता सुरेन्द्र पाण्डेका अनुसार नेपालको संविधान २०७२ ले बामदेवलाई राष्ट्रियसभामा लैजान नरोके पनि मन्त्री वा प्रधानमन्त्री बन्नबाट चाहिं रोकेको छ ।  संविधानले प्रतिनिधिसभामा पराजित कुनैपनि व्यक्ति उक्त सभा रहुञ्जेल संघीय मन्त्री बन्न नपाउने व्यवस्था गरेको उनले बताएका छन् ।

यसरी हेर्दा बामदेवले राष्ट्रियसभामा जान मरिहत्ते गर्नुपर्ने कुनै कारण नभएको पनि पाण्डेले बताएका छन् । आजको सचिवालय बैठकमा यही विषयमा छलफल हुने र एउटा निश्कर्षमा पुगिने जानकारी एकजना सदस्यले दिएका छन् ।