प्रचण्डमाथि जुत्ता प्रहार

१८ फाल्गुण, काठमाडौं । सत्तारुढ नेपाल कम्युनिष्ट पार्टीभित्र आन्तरिक विवाद चर्किरहेका बेला आज कार्यकारी अध्यक्ष पुष्पकमल दाहाल ‘प्रचण्ड’माथि जुत्ता प्रहार भएको छ ।

भरतमोहन अधिकारी फाउण्डेशनद्वारा आज राजधानीस्थित राष्ट्रिय सभागृहमा आयोजित कार्यक्रमलाई संबोधन गरी फर्कन लागेका प्रचण्डमाथि दर्शकदीर्घाबाट जुत्ता प्रहार भएको हो ।

जुत्ता प्रहार गरिएपनि प्रचण्डलाई नलागेको आयोजकले जनाएका छन् । जुत्ता प्रहार गर्ने व्यक्तिलाई प्रहरीले तत्कालै पक्राउ गरेको छ । जुत्ता प्रहार गर्ने नेकपा समर्थित जुम्लाका कार्यकर्ता २२ वर्षीय रतन तिरुवा भएको बताइएको छ ।

जुत्ता प्रहार गर्ने युवा सुस्त मनस्थितिको जस्तो रहेको प्रहरीले बताएको छ । पक्राउ परेका व्यक्तिलाई अहिले सिंहदरबार प्रहरी वृत्तमा राखिएको छ ।