कोरोना भाइरसका कारण नेपाल भ्रमण बर्ष २०२० स्थगित

१९ फागुन काठमाडौं । कोरोना भाइरसका कारण नेपाल भ्रमण बर्ष २०२० औपचारिक रूपमा स्थगित भएको छ । कोरोनाको संक्रमणका कारण विश्वभर महामारी फैलिएपछि आइतबार बसेको मन्त्रिपरिषद् बैठकले नेपाल भ्रमण वर्ष २०२० औपचारिक रूपमा स्थगन गर्ने निर्णय गरेको हो।

चीनबाट फैलिएको कोरोना भाइरसको संक्रमण नेपालमा पनि फैलिन सक्ने उच्च जोखिम देखिएको भन्दै आइतबार साँझ बसेको मन्त्रिपरिषद् बैठकले नेपाल भ्रमण वर्ष २०२० औपचारिक रूपमा स्थगन गर्ने निर्णय गरेको प्रधानमन्त्री प्रेस सल्लाहकार सुर्य थापाले बताए । यो संगै सरकारले आयोजना गर्न लागेको सगरमाथा संवाद कार्यक्रम पनि स्थगन गरि सकिएको छ।

यता अन्तराष्ट्रिय समाचार एजेन्सी अनुसार आइतबार अपरान्ह्सम्म कोरोना भाइरसको सङ्क्रमण विश्वका ६४ मुलुकमा भेटिएको छ।

विभिन्न मुलुकका आधिकारिक स्रोतहरूबाट एएफपीले लिएको तथ्याङ्क अनुसार आइतबारसम्म विश्वभर दुई हजार ९९० जनाको यस भाइरसको सङ्क्रमणका कारण मृत्यु भएको छ भने कूल ८७ हजार ५६५ जनामा भाइरसको सङ्क्रमण पुष्टि भएको छ। शनिबार साँझ ५ बजेपछि आइतबार अपरान्ह्सम्म थप एक हजार ६४६ थप व्यक्तिमा सङ्क्रमण पुष्टि भएको छ।

कोभिड–१९ भनिने उक्त भाइरसको सङ्क्रमण मकाउ तथा हङकङ बाहेक मुख्यभूमि चीनमा कूल ७९ हजार ८२४ जनामा पुष्टि भएको छ भने त्यहाँ कूल दुई हजार ८२४ जनाको सङ्क्रमणका कारण मृत्यु भएको छ।