अर्थमन्त्री डा. खतिवडाको पुन नियुक्ती हुने

२० फागुन, काठमाडौं । राष्ट्रियसभा सदस्यका रुपमा आज अर्थमन्त्री डा. युवराज खतिवडाको अन्तिम दिन हो । नेपालको संविधान २०७२ अनुसार संघीय सरकारको मन्त्री बन्न प्रतिनिधिसभा वा राष्ट्रियसभाको सदस्य हुनु अनिवार्य छ । यसको मतलव भोलिबाट डा. खतिवडाको पद के होला भन्ने अन्योल सर्वत्र फैलिएको छ । तर सूत्र भन्छ डा. खतिवडा भोलि सोही मन्त्रालयको कार्यभारसहित पुनः नियुक्त हुँदै छन् ।

प्रधानमन्त्री के पी ओली हिजो अस्पताल भर्ना हुनु अघि नै राष्ट्रपति विद्यादेवी भण्डारीसमक्ष यस्तो सिफारिश गरिसकेका छन् । ओलीको भोलि शिक्षण अस्पताल महाराजगञ्जमा मृगौला प्रत्यारोपण हुँदै छ । ओलीको अनुपस्थितिमा सबै काम उप–प्रधानमन्त्री एवं रक्षाामन्त्री ईश्वर पोख्रेलले गर्ने भएकाले डा. खतिवडाको सपथ कार्यक्रममा कुनै समस्या पर्दैन । राष्ट्रियसभा सदस्यका रुपमा भने डा. खतिवडालाई पछि कुनै रुपमा मिलान गर्ने ओलीको तयारी रहेको छ ।

नेपाल कम्युनिष्ट पार्टी (नेकपा) सचिवाय बैठकले गत बुधबार उपाध्यक्ष वामदेव गौतमलाई राष्ट्रियसभाको रिक्त पदमा सिफारिश गरेपछि विवाद चुलिएको हो । प्रधानमन्त्री ओली डा. खतिवडालाई नै निरन्तरता दिने पक्षमा देखिएका छन् ।

अहिले कसैलाई पनि राष्ट्रियसभाको रिक्त सदस्यमा सिफारिश नगर्ने तर अर्थमन्त्रीलाई भने पुन नियुक्त गर्ने रणनीति ओलीले बनाएको सूत्रले जानकारी दिएको छ । भोलिबाट १८ जना राष्ट्रिय सभाबाट निवृत्त हुँदै छन् । जसमा नेकपाका ८ , नेपाली काँग्रेसका ६ , समाजवादीका २ , राजपाका १ र मनोनित १ जना रहेका छन् ।