ओलीको नयाँ रणनीति

२० फागुन, काठमाडौं । प्रधानमन्त्री के पी ओली अहिले अस्पतालको शैयामा छन् । मृगौला प्रत्यारोपणको दोस्रो इनिङका लागि उनी अस्पताल भर्ना भएका हुन् । भोलि बुधबार उनको शल्यक्रिया मार्फत मृगौला प्रत्यारोपण हँदै छ । हिजो साँझ अस्पताल पुग्दा उनी बलियो आत्मविश्वास देखाउँदै थिए ।

अस्पताल जानु अघि नेपाली जनतालाई आफ्नो स्वास्थबारे आश्वस्त पार्न भिडियो रेकर्डिङसमेत गर्न भ्याए । कुशल खेलाडीले बीचैमा मैदान नछाड्ने भन्दै गहन राजनीतिक सन्देशसमेत प्रवाहित गरिरहेका थिए ओली ।

जीवन सधैं संघर्षमा बितेको बिगतको स्मरण मात्र गरेनन् अपितु उनले वर्तमानको राजनीतिक संकटको सामना गर्ने सन्देश पनि दिए । जे भएपनि उनले आफ्नो स्वास्थ उपचारमार्फत राजनीतिक सन्देशसमेत प्रवाहित गरे । ओलीले गर्न लागेको मृगौला प्रत्यारोपण र शीघ्र स्वास्थ लाभको कामना सबैले गरेका छन्, हाम्रो पनि शुभकामना ।

अलि फरक प्रसंगलाई यहाँ जोड्न खोजिएको छ, त्यो के भने ओलीले अहिले नै किन मृगौला प्रत्यारोपण गर्न चाहे त ? यो कोणबाट धेरै विश्लेषण गर्न खोजिएको छैन । राजनीतिक संकट आइलागेको बेला मानसिक रुपमासमेत तनाव थपिएको बेला हो अहिले ओलीका लागि । तर यसैबेला किन उनले यस्तो निर्णय गरेका होलान् भन्ने चासो धेरैमा रहेको छ ।

वास्तवमा ओली हरेक दृष्टिले हिसाब किताब गरेर राजनीति गर्ने चतुर नेता भएको ठम्याई कतिपयको छ । राजनीतिक रुपमा यतिबेला उनी ज्यादै संकटमा छन् । पार्टी भित्रको उनको पकड फितलो हुँदै गएको देखिन्छ । दुई तिहाई समर्थन नजिक रहेपनि उनी निरिह प्रधानमन्त्री बन्ने खतरामा रहेका छन् । घटनाक्रम हेर्दा उनको ओज र शक्ति क्षयीकरण भएकै निश्कर्ष निकाल्न सकिन्छ ।

अहिले पार्टी भित्र धेरै चलखेल गर्न नसक्ने अवस्था उनले विश्लेषण गरेकै हुन् । पुष्पकमल दाहाल विस्तारै हावी हुने वातावरण तयार भएको उनले राम्रैसँग चाल पाइसकेका छन् । वामदेव गौतमको काँधमा बन्दूक राखेर फायरिङ सुरु भइसकेको उनलाई ज्ञात नभएको होइन ।

उनले धेरै कोशिश गरे, यो अवस्था नआओस् भनेर । तर जब भैंसेपाटी बैठकबाट आफू घेराबन्दीमा परेको ठहर गरेपछि भने उनी रक्षात्मक भूमिकामा देखा परे । अझ गएको साता उनी विरुद्ध अविश्वास प्रस्तावसमेत ल्याउने तयारीमा प्रचण्ड, माधव नेपाल लगायत नेताहरु तयार भएको भेउ पाएपछि भने उनी अर्काे रणनीति बनाउन वाध्य भए । त्यो हो – स्वास्थ रणनीति ।

आफू विरुद्धको परिवेशलाई तत्काल मत्थर पार्न नसक्ने बुझेका ओलीले यसै बीचमा मृगौला प्रत्यारोपण गर्ने रणनीति बनाए । वामदेवलाई राष्ट्रियसभामा लैजान सचिवालयले दिएको निर्देशन अवज्ञा गर्ने निहुँ चाहिएको थियो ओलीलाई । त्यसैले यो प्रकरणबाट ध्यान मोड्नका लागि उनी अस्पतालको शैयया पुगेका छन् ।

अबको केही हप्ता उनी बिरामीको आवरणमा आलोचनामुक्त हुन चाहन्छन् । बिरामी ओलीलाई राजनीतिक तनाव दिनु भनेको मानवीय संवेदना विपरित हो भन्ने सन्देश प्रवाहित गर्न उनी चाहन्छन् । नभन्दै परिस्थिति त्यस्तै बन्दै छ । वामदेवलाई राष्ट्रियसभामा नलैजान यस्तै बाहना चाहिएको छ ओलीलाई ।

अस्पतालको शैय्यामा होस् वा आराम गर्ने नाममा बालुवाटार बसाईमा किन नहोस् ओली तुलनात्मक रुपमा अब सुरक्षित रहने छन् । आफू विरुद्ध संभावित मोर्चाबन्दीलाई मत्थर पार्न यस अवधिमा उनले अर्काे फण्डा तयार गर्ने छन् । त्यसैले अब ओलीको नयाँ मृगौलाले गर्ने काम पनि नयाँ शीराबाटै गर्ने देखिन्छ ।