खरिदकर्ता र बिक्रीकर्ता दुवै अन्योलमा रहेको आजको बजारलाई कसरी विश्लेषण गर्ने ?

२० फागुन, काठमाडौं । आजभने बजारमा निकै ठुलो उतारचढाव देखियो । त्यस्तै कारोवार समयमा ब्राेकरकाे डाटा बेसमा प्राविधिक समस्या आएपछि करिब ४ बजेसम्म दोश्रो बजारमा शेयर कारोवार भएको थियो । आज लगानीकर्ताहरुले अन्लाईन कारोवार प्रणालीमा समस्या आएको भन्दै नेप्से प्रति दु:ख व्यक्त गरेका थिए ।

नेप्से परिसूचक १४ दशमलव ३७ अंकको वृद्धि हुँदै १५०९ दशमलव ६७ को विन्दुमा बजार बन्द भएको छ । बजारमा कारोवार रकम भने ४ अर्ब मुनि आएको छ । आज ३ अर्ब ८५ करोड बराबरको शेयर खरिदबिक्री भएको छ ।

आज बजारमा खरिदकर्ता र बिक्रीकर्ता दुविधामा थिए । बेला बेलामा खरिदकर्ताहरु आक्रामक रुपमा प्रस्तुत हुन्थ्ये भने केही बेरमा बिक्रीकर्ता हावी हुन्थे । आज बजार खुल्ने बित्तिकै आक्रामक रुपमा बजार घटेको थियो । बजारले ११ बजेर १० मिनेटमा १४३९ दशमलव ५३ को न्यून विन्दु समातेको थियो भने बजारले २ बजेर १० मिनेटमा १५४० दशमलव ६० को उच्च विन्दु समातेको थियो । अन्तिम समयमा लगानीकर्ताहरु अन्योलमा थिए । बजारले अन्तिम समयमा त्यति ठुलो उतारचढाव देखाउन सकेन ।

आज लघुवित्तको लाभाश घट्न सक्ने चर्चासंगै लघुवित्त उपसुचकमा ४ दशमलव ६१ प्रतिशतको गिरावट आएको छ । बजारलाई ड्राइभ गर्ने वाणिज्य बैंकको उपसुचकमा १ दशमलव ७२ प्रतिशतको वृद्धि देखिएको छ भने निर्जीवन बीमा उपसुचमा सर्वाधिक २ दशमवल ५४ प्रतिशतको वृद्धि देखिएको छ ।

हेरौं आज सर्वाधिक कमाउने र गुमाउने कम्पनीहरु :

प्राविधिक बिश्लेषण :

पहिलो प्रतिरोध : १५४० पहिलो टेवा: १५००

• दुई दिनदेखि लगातार शेयर बजारमा बिक्रेताको चाप रहेकोमा आज यो चाप कमजोर भएकोे र खरिदकर्ताको चाप देखिएको छ ।
• आजको मैनबत्तीले “हतौडा” चित्र बनाएको छ। यसले बजारमा खरिदकर्ताको चाप हुन सक्ने जानकारी गराउँदछ ।
• दैनिकी अवधिमा “आरएसआई” ६१ दशमलब ५५ को बिन्दुमा छ । यो अक्सिलेटरले बजारमा खरिदकर्ताकोे चाप हुन थालेको जानकारी गराएको छ ।
• “एडिएक्स” तथा जोड-बिजोड “डाइरेक्सनल इन्डेक्स”हरुले बजारमा हालसम्म विक्रेताको चाप रहेको जानकारी गरेको छ ।
• “अन ब्यालेन्स भल्यूम” र बजारको प्रवृत्ति सामान्य रहेको देखिन्छ  ।
• नेप्से बढेमा पहिलो प्रतिरोध १५४० को क्षेत्रमा पाउने देखिन्छ र घटेमा पहिलो टेवा १५०० को क्षेत्रमा पाउने देखिन्छ ।

बजार गतिविधि

प्राइम बैंककाे ऋणपत्र आउँदै

प्राइम कमर्सियल बैंक लिमिटेडले ल्याउन लागेको ऋणपत्रलाई रेटिङ एजेन्सी केयर नेपालले ए माइनस प्रदान गरेको छ । बैंकले ३ अर्ब ५० करोड रुपैयाँ बराबरको ऋणपत्र बिक्रीमा ल्याउन लागेको छ । १०.५ प्रतिशत ब्याजदर तोकिएको ऋणपत्रका लागि बिक्री प्रबन्धकमा आरबीबी मर्चेन्ट बैकिङलाई नियुक्त गरेको छ । यता, बैंकले ऋणपत्र निष्कासन गर्न हालसम्म धितोपत्र बोर्डमा आवेदन भने दिएको छैन ।

ए माइनस भनेको सो ऋणपत्र पर्याप्तमा लगानी गर्ने लगानीकर्तालाई कुनै ठूलो नोक्सानी नहुने वा हानी नोक्सानी व्यहोर्नुपर्ने संभावना ज्यादै न्यून रहेको भन्ने हो । बैंकले ८ बर्ष अवधिको लागि १ हजार रुपैयाँ अंकित दरमा ३५ लाख कित्ता ऋणपत्र निष्कासन गर्न लागेको छ । सामुहिक लगानी कोष र सर्वसाधारणलाई १४ लाख कित्ता छुट्याइएको छ भने बाँकी २१ लाख कित्ता व्यक्तिगत बिक्री गरिने भएको छ । बोर्डबाट अनुमति प्राप्त भएपछिमात्र ऋणपत्र बिक्रीमा आउने भएकोछ ।

नेपाल बैंकको ब्राण्ड एम्बेस्डरमा महावीर पुन

नेपाल बैंक लिमिटेडको ‘ब्राण्ड एम्बेस्डर’मा युवा वैज्ञानिक डा. महावीर पुन नियुक्त भएका छन् । पुन राष्ट्रिय आविष्कार केन्द्र नेपालका अध्यक्ष पनि हुन् । नवीन सोच भएका युवालाई उद्यमी बन्न र मुलुकको आर्थिक विकासमा योगदान दिन लागिपरेका पुनसँग ब्राण्ड एम्बेस्डर नियुक्ति सम्झौतामा बैंकका प्रमुख कार्यकारी अधिकृत कृष्णबहादुर अधिकारी र डा. पुनले हस्ताक्षर गरेका छन् ।

प्रमुख कार्यकारी अधिकृत अधिकारीले पुनलाई बधाइ दिँदै राष्ट्रिय आविष्कार केन्द्र स्थापना गरेर नयाँँ सोच भएका युवालाई उद्यमी बन्न प्रेरित गरिरहेका व्यक्तिलाई ब्राण्ड एम्बेस्डर नियुक्त गर्न पाउनु गर्वको विषय भएको बताए ।

उनले नेपाल बैंक युवा उद्यमीसँग हातेमालो गर्दै देशको समृद्धिका लागि योगदान दिन तयार रहेको बताए । सम्झौतापछि पुनले नेपालकै सबैभन्दा पहिलो बैंकको ब्राण्ड एम्बेस्डर बन्नु पाउनु आफ्ना लागि सौभाग्य भएको उल्लेख गरे।

सिटिजनको ऋणपत्र खुल्यो

सिटिजन्स बैंकले जारी गरेको ऋणपत्र आजबाट खुलेको छ । बैंकले १० वर्ष अवधिको ‘सिटिजन्स बैंक डिबेन्चर २०८६ ’नाममा ऋणपत्र बिक्री खुला गरेको हो । २ अर्ब ५० करोड रुपैयाँ बराबरको २५ लाख इकाई ऋणपत्रमध्ये १० लाख इकाईमा सर्वसाधारण लगानीकर्ताले आवेदन दिन सक्नेछन् । बाँकी १५ लाख इकाई भने बैंकले आफ्नै पहलमा अन्य संघसंस्थालाई बिक्री गर्ने जनाएको छ । यस ऋणपत्रमा वार्षिक १०.२५ प्रतिशत ब्याज पाइनेछ ।

बिक्री प्रबन्धक ग्लोबल आइएमई क्यपिटल रहेको छ । रेटिङ एजेन्सी इक्रा नेपालले यो ऋणपत्रलाई मध्यम कर्जा जोखिम जनाउने ‘इक्रा एनपी बीबीबी प्लस’ रेटिङ दिएको छ । लगानीकर्ताले यसमा फागुन २३ गतेसम्म यसमा आवेदन दिन पाउनेछन् । उक्त अवधिमा सबै ऋणपत्र बिक्री नभएमा चैत्र ४ गतेसम्म आवेदन दिन पाइनेछ । ऋणपत्रमा प्रतिइकाई १ हजार रुपैयाँको दरले आवेदन दिनुपर्नेछ । न्यूनतम २५ कित्तादेखि अधिकतम ९ लाख ७० हजार कित्तासम्म भर्न पाइनेछ । यस ऋणपत्रमा सी–आस्वाको माध्यमबाट आवेदन दिन सकिनेछ ।

लघुवित्तमाथि राष्ट्र बैंकको कडा आदेश

नेपाल राष्ट्र बैंकले लघुवित्त वित्तीय संस्थाहरुले वितरण गर्ने लाभांशमा नयाँ प्रावधान लागू गरेपछि उच्च मुल्य रहँदै आएको शेयरको मुल्यमा गिरावट आउन सुरु गरेको छ । मौद्रिक नीतिको अर्धवार्षिक समिक्षामा भनिएको छः– अबदेखि वार्षिक २० प्रतिशत भन्दा बढी नगद लाभांश वा बोनस सेयर प्रस्ताव गर्ने संस्थाले ग्राहक संरक्षण कोष र सामाजिक उत्तरदायित्व कोषमा पनि राख्नुपर्ने भएको छ ।

२० प्रतिशतसम्म लाभांशमा भने यस्ता कोषमा छुट्याउनुपर्दैन । तर २० प्रतिशतभन्दा बढीको लाभांशमा भने प्रस्तावित लाभांशको २५ प्रतिशत रकम ग्राहक संरक्षण कोष र अर्को २५ प्रतिशत रकम सामाजिक उत्तरदायित्व कोषमा जम्मा गर्नुपर्ने व्यवस्था गरिएको छ ।