पूँजी बजारले नरुचाएको अर्थमन्त्री खतिवडा, शपथ नलिँदै नेप्सेमा उच्च गिरावट

२१ फागुन, काठमाडौं । पुनः नियुक्त भएर अर्थमन्त्रीले शपथ नखाँदै शेयरबजारमा भारी गिरावट आएको छ । अर्थमन्त्री डा. युवराज खतिवडा अर्थमन्त्रालयबाट बाहिरने संकेत मिलेपछि दिनहुँ रेकर्ड ब्रेक गर्दै बढेको नेपाल स्टक एक्सचेन्ज (नेप्से)ले १६०० अंक काटेको थियो । तर, पुनः उनी नै अर्थमन्त्री नियुक्त भएपछि बजारमा उच्च गिरावट आउँदै आज १२:२० नहुँदै बजार २७ अंकले घटेर १४८२ अंकमा आइ काराेबार भइरहेकाे छ ।

अर्थमन्त्री र अर्थमन्त्रालयले चाल्ने हरेक कदमका कारण नेपाल स्टक एक्सचेन्जमा सिधै असर गरिरहेको छ । खुल्ला पूँजी बजार भनिएता पनि नेकपा समर्थित अर्थमन्त्री र उनकाे मन्त्रालयको छायाँ जस्तो बनेको नेप्से डा. युवराज खतिवडाको पुनरागमन सँगै तीब्र गतिमा ओह्रालो लागेको छ । पछिल्लाे  समय उनले नेपाल राष्ट्र बैंकमा समेत हस्तक्षेप बढाउँदा त्यसकाे नकारात्मक सन्देश बजारमा गएकाे छ ।

लगानीकर्ताको भावना र माग बमोजिम समन्वयकारी भूमीका खेल्न नसकेका डा. खतिवडालाई पूँजीबजारले भने रुचाएको छैन । लगानीकर्ता र पूँजी बजारकाे समस्या समाधान गर्न उनले खासै रूची दिएका छैनन् । उनकाे आगामी कार्यकालमा पूँजी बजारका समस्याहरू समाधानका उपायहरू निस्कन सक्छन् या सक्दैनन त्याे भने गर्भमा नै रहेकाे छ ।

अर्थमन्त्रीमा डा. खतिवडाको पुर्ननियुक्तिको समाचार फैलिएपछि घटेको शेयरबजारका एक खेलाडीले आक्रोशपूर्ण प्रतिक्रिया जनाएका छन् । सन्तनु रेग्मी नामक एक शेयर खेलाडीले आफ्नो फेसबुक वालमा लेख्छन् “लौन सरकार झुटै भएपनि खतिवडाको बर्हिगमनको समाचार बाहिर ल्याईदेउन एकपटक, म यो शेयर बेचिदिई हाल्थे र तिम्रो शासन रहुन्जेल कहिल्यै शेयर भन्ने कारोबार गर्दैनथे ।”