युभेन्ट्सका सुपरस्टार रोनाल्डो क्वारेन्टाइनमा

२९ फागुन, एजेन्सी । कोरोना भाइरसको महामारीले विश्वका विभिन्न मुलुक प्रभावित भइरहेका बेला युभेन्ट्सका सुपरस्टार क्रिस्टियानो रोनाल्डो पनि क्वारेन्टाइनमा बसेका छन् ।

युभेन्ट्सका रोनाल्डोका सहकर्मी डेनिली रुगानीलाई करोना संक्रमण भएको पुष्टि भएपछि रोनाल्डोले घरमै क्वारेन्टाइनको नियम पालना गरिरहेको अन्तर्राष्ट्रिय सञ्चारमाध्यमले जनाएका छन् । उनी आमालाई भेट्न पोर्चुगलको मडेरा पुगेका थिए ।

इटाली फर्कनुअघि उनले क्वारेन्टाइममा बिताउनु पर्ने भएको हो । आइतबार इन्टर मिलानलाई पराजित गरेपछि डेनिलीले टोलीको सामूहिक तस्बिर सार्वजनिक गरेका थिए । जसमा टोलीका अन्य सदस्यसँगै रोनाल्डो पनि रहेका छन् । डेनिलीसँगै रोनाल्डो र अन्य खेलाडीले एउटै ड्रेसिङ रुम प्रयोग गरेकाले पनि सबै खेलाडीलाई क्वारेन्टाइमा राखिनु पर्ने बताइएको छ ।

कोरानो सुरु भएको चीनपछि सबैभन्दा प्रभावित मुलुक इटाली हो । इटालीमा अहिले ६ करोड भन्दा बढी नागरिकलाई घर बाहिर निस्कन दिइएको छैन । कोरोनाकै कारण सिरिए अप्रिल ३ सम्मका लागि स्थगित गरिएको छ । रोनाल्डो क्वारेन्टाइनमा रहेको समाचार पोर्चुगलका अखबारले पहिलो पृष्ठमा महत्वका साथ प्रकाशित गरेका छन् ।