गुणस्तरहीन र विषादियुक्त खाद्यले हाम्रो जीवन आक्रान्त:- कांग्रेस नेता केसी

२ चैत, काठमाडौं । आज आइतबार ! विश्व उपभोक्ता अधिकार दिवस नेपालमा पनि उपभोक्ता हितसँग सम्बन्धित विभिन्न कार्यक्रम गरेर मनाइँदैछ । खास गरी उपभोक्ता अधिकारका क्षेत्रमा काम गर्ने विभिन्न सरकारी तथा गैरसरकारी संघसंस्थाहरुले चेतनामूलक कार्यक्रम गरेर आज यो दिवस मनाउँदै छन् ।

विश्व उपभोक्ता अधिकार दिवस बर्सेनी मार्च १५ तारिखका दिन मनाउने गरिन्छ । सन् १९६२ मार्च १५ का दिन अमेरिकी राष्ट्रपति जोन एफ केनेडीले प्रस्तुत गरेको सुरक्षा, सूचना, छनोट र सुनुवाइलाई उपभोक्ताका चार अधिकारका रूपमा घोषणा गरिएको सम्झनामा विश्वभर यो दिवस मनाइने गरिएकाे छ ।

यसैबीच, नेपाली कांग्रेसका प्रभावशाली नेता तथा पूर्वमन्त्री अर्जुननरसिह केसीले विश्व उपभोक्ता अधिकार दिवसको अवसरमा ट्विटमार्फत स्वतन्त्र बजारको नाममा गुणस्तरहीन तथा छाडा बजार, छनोटको असुविधा, बासी, सडेगलेको, मिसावट तथा विषादियुक्त, प्रदूषित र अस्वस्थकर खाद्य र पानीले हाम्रो जीवन आक्रान्त भईरहेको अवस्थामा यो दिवसले विशेष अर्थ राख्ने बताएका छन् । नेता केसीले उपभोक्ता सरोकारलाई समेट्दै, संविधानसहित करिब ३५ वटा कानुनहरू हाल कार्यान्वयनमा भएकाे तरपनि आपूर्ति व्यवस्थामा संविधान र कानुन मिच्दै तस्कर, भ्रष्ट, आर्थिक अपराधी, कालाबजारिया र कृत्रिम महँगी खडा गर्दै लुटतन्त्र मच्चाउने बिचौलियाको दबदबाले उद्यमी, किसान र उपभोक्ताहरूको एकैसाथ शोषण गरिरहेको परिस्थितिमा विद्यमान दण्डहिनता र अराजक गतिविधिको निर्ममताका साथ अन्त्य गर्नुको विपरित त्यस्तै तत्वहरूको साम्राज्यको सहायक बन्नमा वर्तमान दुईतिहाईको कम्युनिस्ट सरकार रमाईरहेको आराेप लगाएका छन् ।  यसमाथि हाल विश्वब्यापी सन्त्रास र महामारी बन्न थालेको कोरोना भाईरसको समस्याले नेपाललाई समेत आर्थिक सामाजिक संकटलाई थप अस्तब्यस्त बनाउन लागेकोले उपभोक्ताको अधिकार प्रति सतर्कताको आवश्यकता झन् बढी जरुरी भएको बताएका हुन् ।