कांग्रेसमा महाधिवेशन केन्द्रित तयारी सिटौला पक्षको भेला राजधानीमा
कुसुम सेञ्चुरी
चैत ३, २०७६ सोमबार १८:३३:१६
३ चैत्र, काठमाडौं । प्रमुख प्रतिपक्षी दल नेपाली कांग्रेसभित्र पन्पिएको गुटगत राजनीतिले आगामी चौधौं महाधिवेशनमा एउटा निश्चित आकार लिने देखिन्छ । गएको महाधिवेशनमा कृष्णप्रसाद सिटौलाको सहयोगमा सभापति निर्वाचित शेरबहादुर देउवा दोस्रो कार्यकालका लागि तयारी गरिरहेका छन् ।
उता, गत महाधिवेशनमा कोइराला पक्षको समर्थन र साथ पाएका वरिष्ठ नेता रामचन्द्र पौडेल निर्वाचनमा पराजित भएपनि पुनः दोस्रो पटक मौका परीक्षा दिने तयारीमा जुटेका छन् । तर यसपाला उनलाई कोइराला पक्षको समर्थन प्राप्त हुनेनहुने अहिल्यै भन्न सकिने अवस्था देखिंदैन । किनभने आगामी निर्वाचनमा कोइराला परिवारका तर्फबाट एकजना सर्वसम्मत उम्मेदवार बन्ने तयारीमा रहेको प्रष्ट देखिन्छ ।
महामन्त्री डा.शशांक कोइराला मात्र होइन, केन्द्रीय सदस्य डा. शेखर कोइरालासमेत सभापतिका आकाक्षी देखिएका छन् ।कोइराला दाजुभाईले त्यसको तयारी गरेको बुझ्न सकिन्छ । डा. शेखर देश दौडाहामा निस्किएको धेरै भइसक्यो भने महामन्त्री शशांक समेत सभापति देउवाको विकल्पमा आफू तयार रहेको सार्वजनिक रुपमै बताउन अग्रसर भएका छन् । कोइराला परिवारकै अर्का सशक्त आकांक्षीका रुपमा हेरिएकी सुजाता अहिले भने शिथिल छन् । क्यान्सरसँग जुधेर भर्खरै तंग्रिएकी सुजाता यसपटक सभापतिका लागि तयारीमा देखिन्नन् । तर उनी आफ्नै परिवारभित्रका कसैले नेतृत्व गर्नुपर्नेमा भने सहमत देखिन्छिन् ।
त्यसैले वरिष्ठ नेता पौडेलले यसपाला भने कोइराला पक्षको समर्थन पाउने अवस्था बलियो देखिएको छैन । गएको महाधिवेशनबाट तेस्रो धारका रुपमा उदाएको सिटौला समूह भने अहिले पनि पार्टीभित्रको निर्णायक शक्तिका रुपमा देखिएको छ । तेह्रौं महाधिवेशनमा देउवालाई साथ दिंदा पाएको सफलताको आडमा उनले पछि धेरैपटक आफ्नो शक्ति परीक्षण गर्ने मौका पाए । देउवासँग दूरी बढेपछि पार्टी भित्रको समीकरणमा उनी पौडेल निकट देखिए । त्यसो हुने वित्तिकै देउवाको शक्ति शिथिल भएको अनुभूति गरियो ।
तर व्यक्तिगत रुपमा उनी पौडेल भन्दा देउवासँगै निकट लाग्छन् । पछिल्लो अवस्थामा उनको गुटभित्र पनि दुईखाले ध्रुवीकरण भएको देखिन्छ । गगन थापा, प्रदीप पौडेल लगायत युवा समूह पौडेल पक्षसँग मिलेर जानुुपर्ने पक्षमा उभिएका छन् भने शिव हुमागाईं , उमाकान्त चौधरी र भीमसेनदास प्रधान भने देउवासँग समीकरण गर्ने पक्षमा रहेको देखिन्छ ।
यस्तो अन्योलपूर्ण अवस्थाले सिटौलाको भावी गन्तव्य र सहयोग के होला भन्ने चासो सर्वत्र बढेको देखिन्छ । पार्टीभित्र तेस्रो शक्तिका रुपमा रहेका सिटौला आफू सभापति बन्न नसक्ने अवस्थामा जसलाई समर्थन ग¥यो उसैको पक्षमा जनमत सिर्जना हुनसक्ने देखिएको छ । त्यसैले आफ्नो शक्ति एकतृत गर्न सिटौला अहिले जुर्मुराएका छन् । गगन, प्रदीप, शिव, उमाकान्त जस्ता आफ्ना हस्तीलाई एकैथलोमा राखिराख्न उनी हतारिएका छन् ।
आफ्नो गुटको धारणा बलियो बनाउन सिटौलाले आज छुट्टै भेला डाकेका छन् । पुरानो बानेश्वरस्थित अनुपम फुडल्याण्डमा आयोजित भेलामा आफ्नो गुट एकाकार रहेको सन्देश दिने प्रयास गर्दैछन् सिटौला । जसले गर्दा आगामी महाधिवेशनमा आफ्नो पक्ष बलियो बनाउने उनको रणनीति रहेको छ । स्रोतका अनुसार, कोइराला परिवारका तर्फबाट एकजना मात्र उम्मेदवार हुने र पौडेलपछि हट्ने हो भने देउवाको विरोधमा सिटौला उभिने छन् ।
आफू उम्मेदवार नबनी कोइराला परिवारका सदस्यलाई उनी सभापतिमा सहयोग गर्न तयार छन् । गगन र प्रदीपको चाहना पनि यस्तै रहेको स्रोतको भनाई छ । व्यक्तिगत रुपमा सिटौला डा. शेखरसँग सकारात्मक छन् । कोइराला परिवारका तर्फबाट शेखर उम्मेदवार हुने अवस्थामा सिटौलाले गठबन्धन बनाउन सक्ने अनुमान गरिएको छ । आजको भेलामा यिनै विषयमा केन्द्रित भएर बहस गर्न लागिएको हो – सिटौला निकट एक नेताले भने ।
कुसुम सेञ्चुरी
नेपालबहस डटकमकी समाचार सम्पादक/ समाचार प्रमुख कुसुम सेञ्चुरी राजनीति तथा समसामयिक विषयवस्तुमा कलम चलाउँछिन् । फुलवारी एफएमदेखि रेडियो पत्रकारिता शूरु गरेकी कुसुमले रासस, रेडियो अन्नपूर्ण र देशान्तर एफएममा पनि काम गरेकी छन् । केही समय उनले नाइस टीभीमा समाचार प्रस्तोताको रुपमा पनि कुशलतापूर्वक जिम्मेवारी निभाएकी छन् ।
लेखकबाट थपस्काउटको जग्गा कब्जामा गृहमन्त्रीको चासो, मन्त्रालयमा आयुक्तसँग छलफल
चैत १५, २०८० बिहिबार
आईजीपी परिर्वतनको तयारीमा गृहमन्त्री लामिछाने, पुग्ला त चलाउनेको भविष्यवाणी ?
चैत १५, २०८० बिहिबार
८ सय ७७ प्रहरी काजबाट फिर्ता
चैत १५, २०८० बिहिबार
आईजीपी परिर्वतनको तयारीमा गृहमन्त्री लामिछाने, पुग्ला त चलाउनेको भविष्यवाणी ?
चैत १५, २०८० बिहिबार
सरकारले तोक्यो चैते धानको समर्थन मूल्य
चैत १५, २०८० बिहिबार
‘बिराट गोल्ड कप फुटबल’ काे मुख्य प्रायोजनमा एनआईसी एशिया बैंक
चैत १५, २०८० बिहिबार
स्काउटको जग्गा कब्जामा गृहमन्त्रीको चासो, मन्त्रालयमा आयुक्तसँग छलफल
चैत १५, २०८० बिहिबार
कोशी प्रदेशले आगलागी पीडित सन्थाल समुदायका लागि स्थायी घर निर्माणमा पहल गर्ने
चैत १५, २०८० बिहिबार
सादा पोशाकमा प्रहरी परिचालन नगर्न हेडक्वार्टरको पत्र
चैत १५, २०८० बिहिबार