सार्वजनिक सवारी साधनमा यौनजन्य दुर्व्यवहार गर्ने ५४० जना कार्बाहीमा

३ चैत, काठमाडौं । काठमाडाैं उपत्यकामा सार्वजनिक यातायातलाई महिला बालबालिका तथा जेष्ठ नागरिक मैत्री बनाउने उद्देश्‍यले महानगरीय प्रहरी कार्यालय, रानिपोखरीले सुरु गरेको बिशेष अभियान अर्न्तगत करिव एक महिनाको अवधिमा सार्वजनिक सवारी साधनमा यौनजन्य दुर्व्यवहार र पाकेटमारी गर्ने ५ सय ४० जनालाई प्रहरीले नियन्त्रणमा लिएको छ ।

उपत्यकामा सार्वजनिक यातायातर स्थानमा हुने पाकेटमारी, महिला बालबालिका तथा जेष्ठ नागरिक माथि हुने यौनजन्य दुर्व्यवहार मुख्य चुनौतीको रुपमा रहेकोले सार्वजनिक यातायात, किनमेल गर्ने तथा मेलापर्व लाग्ने, भिडभाड हुने स्थानहरुमा महानगरीय प्रहरी कार्यालय र महानगरीय प्रहरी परिसर काठमाडौं, ललितपुर र भक्तपुर समेतबाट सादा पोशाकमा प्रहरी टोली खटिएको हो ।

यस अभियानबाट सार्वजनिक सवारी साधन तथा मेलापर्वहरुलाई व्यवस्थित, सुरक्षित र मर्यादित वनाउदै महिला बालबालिका तथा जेष्ठ नागरिक मैत्री हुंदै गरिरहेको कुरा सयौको संख्यामा भएका कारबाहीबाट देखिएको छ । यस अभियानबाट अपराध गतिविधिहरु न्यूनिकरण हुंदै गराइरहेको छ ।

महानगरीय प्रहरी कार्यालयको तथ्यांक अनुसार पौष महिनादेखि हालसम्म जम्मा ५४० जना मानिसहरुलाई पक्राउ गरिएका मध्ये अश्लिल हर्कत २७ जना, शारिरीक यौनजन्य दुर्व्यवहार ६२ जना, अपशब्द, अश्लिल गाली गलौज १२ जना, पाकेटमारा ८९ जना, लागु औषध लगायत अन्यमा ३५० जना रहेकोमा ६१ वटा मुद्दा दर्ता गरी १४६ जनालाई कानुन बमोजिम कारवाही गरिएको र ३९४ जनालाई सम्झाई बुझाई गरी अभिभावकलाई जिम्मा लगाइएको छ ।

सोही अभियान अर्न्तगत गत साउनदेखि हालसम्म १ हजार ७ सय २० जनालाई प्रहरीले प्रकाउ गरी कारवाही गरेको छ । साथै यससँगैसम्बन्धित ‍अपराधिक गतिविधि, शंकास्पद व्यक्तिबारे सूचना प्रदान गरिदिनु हुन आम नागरिकहरुलाई अनुरोध गरिएको छ ।