कोरोना भाइरसको महामारीले सिङ्गो विश्व आतङ्कित !

५ चैत, नुवाकोट । नेपाली कांग्रेस नुवाकोटका सभापति जगदीश्वरनरसिंह केसीले कोरोना भाइरसको महामारीले सिङ्गो विश्व आतङ्कित भएको बताएका छन् । बुधबार दिउँसो एक विज्ञप्ति जारी गर्दै विश्वव्यापी रुपमा फैलिँदै गएको कोरोना ‘कोभिड १९’ भाइरसलाई विश्व स्वास्थ्य संगठन ‘डब्लुएचओ’ले विश्वव्यापी महामारी घोषणा गरेकाले सिङ्गो विश्व नै आतङ्कित भएको बताएका हुन् ।

सभापति केसीले भनेका छन्, यो महामारीले एकातिर ठूलो मानवीय क्षति भएको र थप अकल्पनीय क्षतिको सन्त्रास फैलिएको छ भने अर्कातिर कतै लक डाउनका कारण उपभोग्य सामग्रीको साँच्चै अभाव त कतै कृत्रिम अभाव र कालोबजारीले जनजीवन कष्टकर हुदै गएको छ । विज्ञप्तिमा अगाडि लेखिएको छ, सङ्कटको यो घडीमा सबैले संयम, सतर्कता र सावधानी अपनाउनु आवश्यक छ । यसको सङ्क्रमण फैलिन नदिन अनावश्यक भ्रमण नगर्नु, भीडभाड र जमघट नगर्नु र खानपान तथा सरसफाइमा सतर्कता अपनाउन नेपाली कांग्रेस नुवाकोट सबैमा हार्दिक अपिल गर्दछ ।

साथै कोरोना भाइरसको सङ्क्रमण र अभावजन्य समस्याबाट आफू बच्नु र अरूलाई बचाउनु सबैको कर्तव्य हो । यो हाम्रो मानवीय धर्म पनि हो । यही शास्वत कर्तव्यलाई मनन् गरी आफ्नो छरछिमेक र वरपरको हालखबर बुझ्ने, वृद्धवृद्धा र बालबालिकालाई सहयोग गर्ने, बजारमा कालोबजारी र कृत्रिम अभाव हुन नदिनेजस्ता कार्य गरी सामाजिक दायित्व निर्वाह गर्न पार्टीका सबै तहका कार्यकर्ता र शुभेच्छुकहरूमा नेपाली कांग्रेस आह्वान गरेको छ केसीद्धारा जारी विज्ञप्तिमा उल्लेख छ ।

केसी विज्ञप्तिद्धारा भन्छन्, पार्टीका स्थानीय समितिहरूले स्थानीय संघसंस्थाहररूलाई समेटी आपत्कालीन टोली, हटलाइन आदि स्थापना गरी तत्काल सक्रिय हुन अनुरोध गर्दछु । विश्वको कुनै पनि मुलुकमा रहेका नेपालीहरूलाई सम्बन्धित मुलुकहरूमा रहेका नेपाली दूतावासहरूसँग समन्वय गर्नुहुन र केही समस्या भए आफूले चिनेको कुनै पनि कांग्रेस नेतृत्वसँग सम्पर्क रहि जानकारी गराउनुहुन पनि नेपाली कांग्रेसले यसै विज्ञप्तिमार्फत अनुरोध गरेको छ ।