शेयर बजारमा पनि कोरोना त्रास, कारोबार बन्द गर्न माग

६ चैत, काठमाडौं । कोरोना त्रासले दैनिक हुने शेयर कारोबार केही समयका लागि बन्द हुने भएको छ । शेयर कारोबार बन्द गर्नुपर्ने माग राख्दै शेयर लगानीकर्ता संघसंस्थाका प्रतिनिधिहरू नेपाल धितोपत्र बोर्ड पुगेका छन् ।

साथै, उनीहरुले क्लोजआउट समस्या समाधानको माग पनि अघि सारेका छन् । लगानीकर्ता संघसंगठनका प्रतिनिधिले केही दिन पहिले पनि बोर्ड अध्यक्षसँग क्लोज आउटसहित पुँजी बजारमा देखिएका अन्य समस्याहरु समाधान गर्न माग गरेका थिए ।

सरकारले बुधबार एक सूचना जारी गर्दै बढी भीडभाड भएको ठाउँमा नजान सर्वसाधारणलाई आग्रह गरेको छ । साथै, सार्वजनिक स्थलमा २५ जना भन्दा बढी भेला हुन पनि रोक लगाइएको छ । यो सँगै शेयर बजारका लगानीकर्ताले पनि शेयर कारोबार केही समयका लागि स्थगित गर्नुपर्ने माग राखेका हुन् । यता, नेप्सेले पनि कारोबार बन्द गर्ने या अनलाइन प्रणालीमार्फत सञ्चालन गर्ने भन्ने विषयमा छलफल अघि बढाएको छ ।

यद्दपि, यसको टुंगो भने लागिसकेको छैन । यतिबेला अमेरिका, बेलायत लगायत प्रमुख देशका शेयर बजारहरु खुल्ने समय छोट्याउने कि भन्ने बारेमा चर्चाहरु समेत सुरु भइसकेका छन् । फिलिपिन्सले त अर्को व्यवस्था नभएसम्मका लागि शेयर बजार नै बन्द गरेको छ ।