पूर्वी नवलपरासीका किसानहरु चैते धान रोपाईमा ब्यस्त

मिना कंडेल
६ चैत्र, नवलपुर । पूर्वी नवलपरासीका किसानहरु यतिखेर चैतेधान रोपाईमा ब्यस्त भएका छन् । कृषि ज्ञान केन्द्रले दिएको जानकारी अनुसार नवलपुरमा १७ सय ७५ हेक्टर क्षेत्रफलमा चैतेधान रोपिने तयारी भएको छ । यसवर्ष चैतेधान केही छिटफुट स्थानमा बाहेक पकेट क्षेत्रमा रोपाई काम शुरु भएको छ भने कुनै स्थानमा रोप्ने तयारी चल्दैछ ।

वर्षेधान भन्दा चैतेधानको उत्पादकत्व जिल्लामा बढि हुने गरेको कृषि ज्ञान केन्द्र इकाई नवलपुरकी बाली संरक्षण अधिकृत मिरा चौधरीले बताईन । गत वर्ष ६ हजार ७ सय हेक्टरमा लगाईएको धान अहिले १ सय हेक्टर बढेर ६ हजार ८ सय हेक्टरमा धान लगाईएको बाली संरक्षण अधिकृत चौधरीले जानकारी गराइन । यो वर्ष धान उत्पादनसमेत ३ दशमलव ०५ मेट्रिक टन बढ्ने अपेक्षा गरिएको छ ।

जिल्लाको कावासोती, गैडाकोट र मध्यविन्दु नगरपालिकामा चैते धान रोपिन्छ । विशेषगरी, सिमसार, नदीकिनार र सिंचाईको सुविधा भएको क्षेत्रमा चैतेधान धेरै रोप्ने गरिन्छ । यहाँ चैते धान ५, हर्दिनाथ, विन्देश्वरी, सुख्खा धान, साईचुङ र चाईनाङ जातका धान लगाईने गरिएको जिल्ला कृषि ज्ञान केन्द्रले जनाएको छ ।