गोकुल बाँस्कोटाको घरमा विष्फोट गराउनेको पहिचान

७ चैत, काठमाडौं । पूर्व सञ्चार मन्त्री गोकुलप्रसाद बाँस्कोटाको लोकन्थलीस्थित निजी निवासमा केही दिन अघि विष्फोट गराउनेहरुको पहिचान प्रहरीले खुलाएको छ ।

महानगरीय अपराध महाशाखाले दिएको जानकारी अनुसार, पक्राउ पर्नेहरुमा कैलाली घर भएका लक्ष्मण सेठी, सोही स्थानका अमृत कुमाल र कालीकोटका टेकबहादुर लोहार रहेका छन् ।

गएको फागुन २८ गते पूर्वमन्त्री बाँस्कोटाको भक्तपुरको लोकन्थलीस्थि निर्माणाधिन घरमा प्रेसर कुकर बम विष्फोट गराइएको थियो । सेक्युरिटी प्रेस खरिद प्रकरणमा घूसको बार्गेनिङ गरेको अडियो टेप सार्वजनिक भए लगत्तै गत फागुन ७ गते बाँस्कोटाले राजीनामा दिएका थिए ।

त्यसपछि पनि उनी प्रधानमन्त्री के पी ओलीको बालकोटस्थित निजी निवासमा बसिरहेका थिए । स्थानीयले आफ्नो टोलमा घूस्याहालाई बस्न नदिने भन्दै विरोध जनाउन थालेपछि बाँस्कोटा आफ्नै घरमा सर्ने तयारी गरिरहेका थिए । लगत्र्तै उनको घरमा सरकारद्वारा प्रतिबन्धित नेकपा माओवादी विप्लव समूहले १० बूँदे आरोपसहित विष्फोट गराएका थिए ।