एक हप्तामै शेयर बजारमा १०७ अंकको गिरावट आउँदा, लगानीकर्ताको सम्पत्ति कतिले घट्यो ?

७ चैत, काठमाडौं । यो साता शेयर बजारका लगानीकर्ताको लागि त्यति सुखद साता रहेन।  यो साता पुरै ५ दिन नै शेयर कारोवार भएपनि कोरोना भाइरसको त्रासले गर्दा बजारमा बिक्रीकर्ता हावी हुँदा नेप्से परिसूचकमा १०७ दशमलव ८७ अंकको गिरावट आएको छ । यो साता शेयर बजार तीन दिन घटेको थियो भने दुई दिन वृद्धि भएको थियो । साताको अन्तिम कारोवार दिन नेप्से परिसुचकमा वृद्धि देखिएको थियो । अघिल्लो साताको अन्तिम कारोवार दिन बजार पुँजीकरण १७ खर्ब ६० अर्ब रहेकोमा यस साताको अन्तिम कारोवार दिन बजार पुँजीकरण १६ खर्ब २३ अर्ब रहेको छ । यसरी बजार पुँजीकरण १ खर्ब ३७ अर्बले घटेको छ। 

 

अघिल्लो साताको अन्तिम कारोवार दिन नेप्से परिसूचक १३७७ दशमलव १८ को विन्दुमा बन्द भएकोमा यस साता अन्तिम कारोवार दिन विहिबार नेप्से परिसूचक १२६९ दशमलव ३१ को विन्दुमा बजार बन्द भएको छ।  नेप्से परिसूचक ७ दशमलव ८३ प्रतिशतको गिरावट आएको छ।

यो साता नेपाल लाईफ इन्स्योरेन्सको सर्वाधिक शेयर कारोवार भएको छ। त्यस्तै दोश्रोमा एनआईसी एसियाको शेयर कारोवार सर्वाधिक भएको छ।

शेयर बजारमा पहिरो जाने क्रम जारी रहेको छ । कोरोनाको भाइरसले गर्दा लगानीकर्ताहरु केही आत्तिएको अवस्था छ।कोरोना भाइरसको कारणले गर्दा लगानीकर्ताको मनोबल कमजोर हुँदै गएको र धितोपत्र बोर्डले अर्को साताबाट शेयर बजार बन्द नगर्ने निर्णयसंगै केही लगानीकर्ताहरु खुशी देखिएका छैनन् ।