कोरोनाविरुद्ध राष्ट्रिय एकता आजको आवश्यकता : नेता अर्जुननरसिंह केसी

१० चैत्र, काठमाडौं । कोरोना भाइरसले समग्र संसारलाई आक्रान्त पारको बेला नेपाल सरकारले देखाएको सक्रियतालाई अझ प्रभावकारी बनाउन नेपाली कांग्रेसका प्रभावशाली नेता अर्जुननरसिंह केसीले आह्वान गरेका छन् । नेता केसीले आज जारी गरेको विज्ञप्तिमा कोरोनालाई परास्त गर्न समग्र मुलुक एकताबद्ध हुनुपर्ने उल्लेख छ ।

सम्पूर्ण विश्व नै यो कोरोनाबाट आक्रान्त भएका बेला नेपालमा र विदेशमा रहेका नेपालीमा फाट्टफुट्ट प्रभाव देखिएपनि आत्तिनुपर्ने अवस्था नरहेकोमा सन्तोष व्यक्त गर्दै नेता केसीले भनेका छन् – “तर संभावित संक्रमणबारे आएका सूचनाले सबैलाई त्रस्त बनाएको छ, त्यसलाई परास्त गर्न समग्र देश एकजुट भएर सामना गर्नुपर्छ ।”

राष्ट्रिय संकटको यो बेला सबै एक हुने नेपाली संस्कार र परम्परालाई फेरि एकतावद्ध ढंगले सामना गर्ने बेला आएको छ भन्दै केसीले अहिले कुनपनिै आग्रह पूर्वाग्रहबाट माथि उठेर एकजुट हुनु सबैको कर्तव्य हो भनेका छन् । साथै, यो महामारीबाट जोगिने एकमात्र उपाय भनेको निरोधात्मक उपचार नै भएको स्मरण गर्दै नेता केसीले जारी गरेको विज्ञप्तिमा भनिएको छ – “अहिले हामीले व्यापक रुपमा जनचेतना फैलाएर उच्च मनोबल र आत्मबलका साथ सामना गर्नु एकमात्र अचुक उपाय हो ।”

अहिलेको संवेदनशील घडीमा भ्रम, अतिशयोक्तिपूर्ण र त्राश फैलाउने गैरजिम्मेवार एवं अनुत्तरदायी क्रियाकलापबाट आफूलाई अलग राखी स्वयंलाई सुरक्षित राख्नु नै उत्तम उपाय हो भन्दै कांग्रेस नेता केसीले सरकार जिम्मेवार ढंगमा प्रस्तुत हुँदै मुलुक र जनताका लागि कार्यमूलक भूमिकामा उपस्थित हुनुपर्नेमा जोड दिएका छन् । यस्तो संकटका बेला कतिपयले नाजायज फाइदा उठाउन खोज्ने भएकाले त्यस्ता तत्वलाई कडाइका साथ कारबाहीको दायरामा ल्याउन समेत नेता केसीले सरकारलाई अपिल गरेका छन् ।

त्यस्ता तत्वलाई कडाइका साथ कारवाही गर्दा हाम्रो पूर्ण सहयोग र समर्थन रहने छ भन्दै विज्ञप्तिमा भनिएको छ – “अहिले सबैजना घरमै बसेर संक्रमणको खतराबाट जोगिनु बुद्धिमानी हो र यो अवधिलाई रचनात्मक कार्यमा लगाउन सकौं ।” साथै कोरोनाको महामारीबाट जोगिन सबैमा आत्मानुशासन, चेतना, दृढता, आत्मविश्वास एवं उच्च मनोबलको आवश्यकता छ भन्दै यो मनोबल र सचेतनाका साथ सजग रहन सम्पूर्ण नेपाली दाजुभाई तथा दिदी बहिनीलाई हार्दिक अपिल गर्दछु – विज्ञप्तिमा उल्लेख छ ।