संक्रमणको शंका लाग्यो भने १०२ नंम्बरमा फोन गर्नुस

११ चैत्र, काठमाडौं । काठमाडौं महानगरपालिकाले कसैलाई कोरोना संक्रमणको आशंका लागे उपचारका लागि सघाउने तत्परता व्यक्त गरेको छ । महानगरपालिका प्रमुख विद्यासुन्दर शाक्यले आज जारी गरेको विज्ञप्तिमा यस्तो तत्परता व्यक्त गरिएको हो ।

कसैलाई संक्रमणको शंका लाग्यो भने १०२ नंम्बरमा फोन गर्न सकिने भन्दै जानकारी पाउना साथ महानगरपालिकाले एम्बुलेन्स पठाउने बताइएको छ । महानगरवासीलाई कुनैपनि समस्या आए उद्धारका लागि टीम तयार राखिएको दावी गर्दै ११८० मा डायल गर्न आग्रह गरिएको छ ।

यसका साथै अन्य कुनैखाले समस्या आए प्रमुख, उपप्रमुख लगायत वडा अध्यक्षसँग मोबाइलमा समेत प्रत्यक्ष सम्पर्क गर्न सकिने व्यवस्था मिलाइएको छ । सरकारले आजबाट थालेको लकडाउन सफल बनाउन सम्पूर्ण नगरबासीलाई आग्रहसमेत गरिएको छ ।

कोरोना भाइरसविरुद्ध सरकारले अपनाएको लकडाउनलाई सफल बनाउन सबैलाई अपिल गर्दै विज्ञप्तिमा भनिएको छ– अहिलेको संक्रमणकालमा सबैजना घरभित्रै बसेर कोरोनालाई परास्त गर्ने बेला हो ।