संकटमा आदेश र आह्वानको पूर्णतः पालना गर्न नुवाकाेट कांग्रेसकाे अनुराेध

११ चैत्र, नुवाकोट । नेपाली कांग्रेस नुवाकाेटका जिल्ला सभापति जगदीश्वरनरसिंह केसीले कोरोना भाइरसको महामारीले सिङ्गो विश्व आतङ्कित भइरहेकाले सर्तकता अपनाउन आग्रह गरेका छन् ।

सामाजिक सञ्जाल फेसबुकमा एक स्टाटस लेख्दै उनले हाल नेपालभित्र पनि कोभिड-१९ को केस रेकर्ड भइसकेको छ र जोखिम प्रमाणित भइसकेकाले सर्तकता अपनाउन र सबैले आआफ्नो ठाउँबाट सक्दो सहयोग गर्न अपिल गरेको बताएका हुन् ।

अगाडि उनले भनेका छन्, यो महामारीको सामना गर्न र यसलाई फैलिन नदिन सरकारले देशलाई लकडाउनको अवस्थामा लगेको छ । संकटको यो घडीमा सरकारी आदेश र आह्वानको पूर्णतः पालना गर्नु सबै नागरिकको कर्तव्य हो ।

यस्तै नेपाली कांग्रेस नुवाकोटले सबैमा संयम र धैर्यपूर्वक जो जहाँ छ त्यही ‘घर,डेरा, अफिस जहाँ छ त्यही’ बस्न, कसैसँग प्रत्यक्ष सम्पर्क नगर्न, बाहिर ननिस्कन र सरसफाइमा ध्यान दिन तथा कोभिड-१९ का लक्षण देखा परे तुरुन्त स्वास्थ्य संस्थामा सम्पर्क गर्न आह्वान गरेको सभापति केसीले बताए ।

अहिले सिङ्गो विश्व एक भएर महामारीसँग लड्नुपर्ने यो समयमा आग्रह र प्रतिक्रियाबाट माथि उठी सरकारी अभियानलाई सघाउनुपर्ने दायित्वबाट विमुख नहुन र सुरक्षित रहन नेपाली कांग्रेस पार्टीका सबै कार्यकर्ता, शुभेच्छुक एवं आम नागरिकहरूमा सभापति केसीले अपिल गरेका छन् ।