अलपत्र परेका १० हजार विदेशी पर्यटकको उद्धार गरिंदै

१३ चैत्र, काठमाडौं । कोरोना भाइरसको संन्त्रासले यतिबेला लगभग पूरा संसार नै लकडाउन छ । महाशक्ति अमेरिका होस् वा युरोपेली मुलुक किन नहुन्, सबैको नियति उस्तै छ । हाम्रो उत्तरी छिमेकी चीनको बुहानबाट सुरु भएको यो महामारीबाट उ थोरै भएपनि राहत पाउने अवस्थामा पुगेको छ । तर त्यहाँबाट सल्केको डँढेलोले अन्यत्र भने विनाश लीला मच्चाउने लक्षण देखाएको छ ।

दक्षिणी छिमेकी भारतमा समेत यो महामारी भयावह बनेपछि नेपाल बढी संवेदनशील भएको छ । जुन आवश्यक पनि हो । भारतले पनि अहिले तीनहप्ते लकडाउन थालेको छ । अकस्मात यस्तो निर्णय गर्दा कतिपय व्यवहारिक पक्षलाई ठूलै घात हुने देखियो । भारतको मुम्बैबाट नेपाल हिंडेका कतिपय नेपाली दिल्ली आइपुगेपछि लकडाउनको चपेटामा परेका छन् । उनीहरु भोकभोकै सडकमै रात कटाउन बाध्य भएको समाचार भारतीय सञ्चारमाध्यमले सार्वजनिक गरेका छन् ।

त्यस्तै अवस्था नेपालमा पनि देखिएको छ । युरोप अमेरिकाबाट नेपाल घुम्न आएका पर्यटकहरु अप्रत्यासित रुपमा गरिएको लकडाउनले हल न चलको अवस्थामा पुगेका छन् । विभिन्न पर्यटकीय क्षेत्रमा अलपत्र परेका उनीहरुलाई नेपाल सरकारले काठमाडौं ल्याएर स्वदेश फर्काउने प्रबन्ध मिलाउन सुरु गरेको छ ।

देशका विभिन्न भागमा पुगेका विदेशी पर्यटकको तथ्यांक सरकारले तयार गरेको छ । पर्यटन मन्त्री योगेश भट्टराईका अनुसार, हाल नेपाल घुम्न आएका करिब १० हजार विदेशी पर्यटक अलपत्र परेका छन् । उनीहरुलाई स्वदेश फर्काउने तयारीसमेत सरकारले गरेको जानकारी उनले दिएका छन् ।

भोलिसम्म युरोपका केही पर्यटकलाई फर्काउन विमान आउँदै छ – मन्त्री भट्टराईले भनेका छन् यो क्रम विस्तारै अघि बढ्ने छ । युरोप अमेरिका, जापान र अष्ट्रेलियाका नागरिकलाई सुरुमा पठाउने तयारी रहेको जानकारी पनि उनले दिएका छन् । हामीले आप्mनो जिम्मेवारी पूरा गर्नैपर्छ भन्दै उनले विदेशी पर्यटकलाई जसरी पनि उद्धार गरिने बताएका छन् ।