सुन्नुस त, कतै बिहान बेलुका ‘फ्रेश’ हुने बहानामा बाहिर निस्कनु भएको त छैन ?

१८ चैत्र, काठमाडौं । सरकारले ‘लकडाउन’का बेला पालना गर्नुपर्ने अनुशासनको पूर्ण पालना गर्न आग्रह गरेको छ ।लकडाउनका बेला घरमै बस्नुपर्ने भए पनि फाट्टफुट्ट उल्लङ्घन भएको भन्दै गृह मन्त्रालयले नियमको पूर्ण कार्यान्वयन गर्न अनुरोध गरेको हो ।

सरकारको आदेश पालना नगर्ने, अति आवश्यक बाहेक पनि यात्राका लागि पास माग्ने र प्रशासनमा दबाब दिने जस्ता काम नगर्न गृह मन्त्रालयका प्रवक्ता केदारनाथ शर्माले आग्रह गरेका छन् ।

अहिले अरु बेलाभन्दा फरक अवस्था रहेको भन्दै उनले मर्निङ वाक, इभिनिङ वाक, सरसामग्री किनमेल, आफन्त भेटघाट जस्ता काम पनि नगर्न उनले अनुरोध गरे । दिनभर घरभित्रै बस्ने तर बिहान बेलुका ‘फ्रेश’ हुने बहानामा बाहिर निस्कने र जमघट हुने गर्दा पनि कोरोना भाइरस ‘कोभिड १९’ सङ्क्रमणको जोखिम बढ्ने उनको भनाइ छ ।

सरकारले लकडाउन थप एक हप्ता लम्ब्याएको छ । गृह मन्त्रालयका प्रवक्ता शर्माले लकडाउनका बेला सुरक्षाकर्मीलाई ढाँटेर वा छलेर हिँडडुल नगर्न र संयमित रहन पनि आग्रह गरेका छन् । उनले कठिन परिस्थितिमा सबैले अनुशासनको पालना र धैर्यता कायम राख्नुपर्ने बताए ।