यशोदादेवी भगवान सिंह केसी मेमोरियल ट्रष्टले वितरण गर्यो मास्क र पीपीई

२२ चैत्र, नुवाकोट । विश्वव्यापी महामारीको रुपमा फैलिएको कोरोना भाइरसको संक्रमणले नेपाल पनि अछुतो रहेको छैन् । हालसम्म ७ जनामा कोरोनाको संक्रमण फेला परेको तथा केहीमा संक्रमणको आशंका गरिएको बेला उपचारमा संलग्न डाक्टर तथा स्वास्थ्यकर्मीहरुलाई सुरक्षा सामाग्रीको अभाव निकै खड्किएको छ ।

संम्भावित संक्रमणको जोखिमबाट बच्न स्वास्थ्यकर्मीहरुले लगाउने पीपीई र मास्कको नेपालभर नै अभाव भईरहेको बेला नुवाकोटका दुई नेताले भने त्यसको जोरजाम गरेर स्थानीय स्वास्थ्य चौकीहरुमा वितरण गर्न थालेका छन् ।

समाचार अनुसार यशोदादेवी भगवान सिह केसी मेमोरियल ट्रष्टले आज दुप्चेश्वर गाउँपालिकाका ७ वटा वडामा रहेका स्वास्थ्य चौकीहरुका लागि ७ गोटा पीपीई र १०० स्थान माक्स उपलब्ध गराएको छ । नुवाकोट कांग्रेस सभापति जगदीश्वरनरसिंह केसी र नेपाल चिकित्सक संघका पूर्व अध्यक्ष डा. केदारनरसिंह केसीले सो सहयोग उपलब्ध गराएका हुन् । आफ्ना आमाबाबुको नाममा स्थापित सो ट्रष्टले नुवाकोट जिल्लाका लागि बिगतमा पनि थुप्रै सामाजिक कार्यहरु गर्दै आएको छ ।

स्वास्थ्य सामाग्री हस्तान्तरण पछि नेपालबहससँग छोटो कुरा गर्दै सभापति केसीले कोरोना भाइरसको महामारीले विश्व आक्रान्त छ । नेपाल पनि यो महामारीको उच्च जोखिममा रहेको र यसबाट बच्न सिंगो देश एक भएर महामारीसँग जुध्नुको विकल्प छैन । यतिखेर मानिस मानिसका बीच भौतिक दूरी कायम गर्नु अपरिहार्य छ, जसका लागि पर्याप्त क्वारेन्टाइनमा बस्नुपर्ने हुन्छ । यतिबेला यो अभियानमा सहभागी हुनु यो संस्थाको पनि कर्तव्य हो । आवश्यक परेमा अन्य किसिमको सहयोग पनि उपलब्ध गराउने जनाए ।

यस्तै चिकित्सक संघका पूर्व अध्यक्ष डा. केदारनरसिंह केसीले सरकारले सबैभन्दा पहिले डाक्टर तथा स्वास्थ्यकर्मीहरुलाई सुरक्षित गर्नुपर्ने आवश्यकता औल्याउदै देशभर पर्याप्त मात्रामा कोरोना भाइरसको परीक्षण गर्नुपर्ने खाँचो रहेको बताएका छन् ।