भ्रष्टमन्त्री हटाउन सचिवालय बैठक राख्न नेकपाभित्र चर्काे दवाव

२२ चैत्र, काठमाडौं । कोरोना भाइरस विरुद्ध आवश्यक स्वास्थ्य सामग्री खरिद प्रकरणमा मन्त्री तथा प्रधानमन्त्रीका सल्लाहकारको नाम मुछिएर समाचार सार्वजनिक हुनेक्रम बढेसँगै नेकपाका शीर्ष नेताहरुले सचिवालय बैठक राख्न जोड दिएका छन् ।

पार्टीको कार्यकारी अध्यक्षको भूमिकामा रहेका पुष्पकमल दाहाल ‘प्रचण्ड’ मार्फत नेताहरुले बैठक डाक्न दवाव बढाएका हुन् । हिजो साँझ पूर्व प्रधानमन्त्रीसमेत रहेका वरिष्ठ नेता झलनाथ खनालले प्रचण्डलाई फोन गरी तत्काल सचिवालय बैठक डाक्न आग्रह गरे ।

लगत्तै प्रचण्डले अर्का नेता माधवकुमार नेतालाई फोन गरी बैठक डाक्न आवश्यक रहे नरहेको सल्लाह लिएका थिए ।नेता नेपालले यस्तो गम्भिर र संवेदनशील विषयमा छलफल गर्नैपर्ने राय प्रकट गरेपछि प्रचण्डले बैठक डाक्नुपर्ने भन्दै आफू निकट नेताहरुसँग हिजै राति सल्लाह गरेका थिए ।

सल्लाह बमोजिम आज बिहानै प्रचण्डले प्रधानमन्त्रीसमेत रहेका पार्टी अध्यक्ष केपी ओलीलाई फोन गरी शीर्ष नेताको सल्लाहमा सचिवालय बैठक डाक्न लागेको जानकारी दिए ।  तर प्रधानमन्त्री ओलीले केही समय प्रतीक्षा गर्न भनेकाले आजै बैठक बस्ने नबस्ने तय नभएको प्रचण्ड निकट नेताले बताए ।

प्रचण्डले सचिवालय बैठक डाक्न दवाव दिएकाले ओलीले आजै साँझ ४ बजेका लागि मन्त्रिपरिषदको आकस्मिक बैठक डाकेका छन् । संभवतः भोलि सचिवालय बैठक बस्ने स्रोतको भनाई छ । स्वास्थ्य सामग्री खरिद प्रकरणमा पहिला मन्त्रिपरिषदमा छलफल गर्ने उनको सोच रहेको बताइन्छ ।

चीनबाट खरिद गरिएका न्यून गुणस्तर तथा अत्यधिक महंगो स्वास्थ्य सामग्री खरिद प्रकरणमा रक्षामन्त्री ईश्वर पोखरेल, स्वास्थ्यमन्त्री भानुभक्त ढकाल, प्रधानमन्त्रीका प्रमुख राजनीतिक सल्लाहकार विष्णु रिमाल र उनका छोराहरुको नाम जोडिएको छ ।

चीनबाट ल्याइएको सामग्रीमा भ्रष्टाचार र अनियमितता भएको भन्दै सञ्चारमाध्यमले सप्रमाण लगातार प्रश्न उठाएपछि ओलीको ठाडो आदेशमा सम्झौता रद्ध गरेको नाटक मञ्चन गरिएको थियो ।