राहत वितरणमा समेत नेकपाको बार्गेनिङ ! कांग्रेस नेता केसी भन्छन–सर्वदलीय संयन्त्र बनाऊँ

२२ चैत्र, काठमाडौं । कोरोना भाइरसबाट देश आक्रान्त छ, तर सत्ताधारी दल नेपाल कम्युनिष्ट पार्टीका नेता कार्यकर्ता भने यही बेला हो भन्दै कमाउधन्दामा लागेका छन् । केन्द्रीय स्तरका नेताहरु अर्बाैं रुपैयाँको कमिशनको दलालीमा लागेका छन् भने स्थानीय तहका कार्यकर्ता भने राजनीतिक अभिष्ट पूरा गर्ने हतियारका रुपमा कोरोना कहरलाई दुरुपयोग गर्दैछन् ।

दुई साता लामो लकडाउनले गरिब, निमुखा र दैनिक ज्यालादारी गरेर खाने वर्गको बिल्लीबाठ भएको छ । उनीहरुलाई राहत वितरण गर्नुपर्छ भनेर सरकारमाथि चर्काे दवाब परेपछि स्थानीय निकायलाई आह्वान गरिएको छ । यसरी वितरण गर्दा सत्तारुढ नेकपाका नेता कार्यकर्ताले राहत वितरणलाई राजनीतिक हतियार बनाएका छन् । राहत पाउन गरिब, निमुखा वा दैनिक ज्यालादारी गर्ने भन्दा नेकपा समर्थक हुनु अनिवार्य बनाइएको छ ।

यस्तो अवस्था राजधानी लगायत गाउँ गाउँमा देखिएको छ । राहत पाउनका लागि नेकपाको सदस्यता लिनुपर्ने जस्ता शर्त राख्न थालिएका छन् । नत्र नेकपा समर्थकले मात्र त्यस्तो सरकारी राहत पाउने अवस्था बनाइएको छ ।

नेपाली कांग्रेसका प्रभावशाली नेता तथा पूर्वमन्त्री अर्जुन नरसिंह केसीले यस्तो गलत तरिका अपाएर नेकपाले राजनीतिक दुष्टता देखाएको तर्क गरेका छन् । आफूलाई देशैभरिका साथीहरुले यस्तो रिपोर्टिङ गरिरहेको उनले नेपालबहस डटकमलाई जानकारी दिएका छन् । देशमा यत्रो महासंकट आएका बेला पनि नेकपाका साथीहरुले अनावश्यक राजनीति गरेको भन्दै उनले यस्ता क्रियाकलापको कडा शब्दमा भत्र्सना गरेका छन् ।

भोकै बस्न बाध्य, विचल्लीमा परेको दैनिक परिश्रम गरी परिवार पाल्नेहरुलाई राहत वाँड्दासमेत धाँधली गर्नु राजनीतिक बेइमानी हो भन्दै नेता केसीले भने –यो महासंकटलाई राजनीतिक स्वार्थमा प्रयोग गरिनु घोर निन्दनीय काम हो । एक त राहत वितरण गर्दा आफ्ना पक्षकालाई मात्र गर्ने, अरुलाई गर्नुपरे पार्टी सदस्यता लिनुपर्ने ? यो भन्दा ठूलो राजनीतिक पाखण्ड अरु केही हुन सक्दैन– नेता केसीले भने ।

अब यसको नियन्त्रण, अनुगमन तथा निष्पक्ष वितरणका लागि स्थानीय तहमै सर्वदलीय संयन्त्र बनाउनुको बिकल्प छैन भन्दै नेता केसीले यसका लागि तत्काल पहल गर्न नेकपासँग माग गरेका छन् ।  विगतमा पनि यस्तो अभ्यास गरिएको हो, अहिले पनि त्यसैको अबलम्बन गरौं – उनले भने ।