प्रधानमन्त्री ओलीको निर्मम नीति भाषणमा होइन व्यवहारमा देखिनुपर्ने:- राप्रपा अध्यक्ष राणा

२५ चैत्र, काठमाडौं । राष्ट्रिय प्रजातन्त्र पार्टीका अध्यक्ष पशुपतिशमशेर राणाले प्रधानमन्त्री केपी ओलीले भ्रष्ट्राचारविरुद्धको निर्मम नीति भाषणमा होइन व्यवहारमा देखाउनु पर्ने बताएका छन् ।

भष्ट्राचार र अनियमितताविरुद्ध निर्मम भएर प्रस्तुत हुने प्रधानमन्त्रीको निरन्तर प्रतिबद्धता, निर्मम रूपमा व्यवहारमा कार्यान्वयन हुनपर्दछ । प्रधानमन्त्रीसँग देश र जनताको अपेक्षा यही हो, प्रधानमन्त्री ओलीको देशबासीको नाममा आएको सम्बोधनपछि अध्यण राणाले भने ।

‘प्रधानमन्त्रीज्यूले भ्रष्टाचार र अनियमितताविरुद्ध निर्मम भएर प्रस्तुत हुने बताउदै आउनु भएको हो । आज पनि सो प्रतिवद्धता दोहोर्याउनु भएको छ । प्रधानमन्त्रीज्यूको प्रतिवद्धता निर्मम रूपमा व्यवहारमा लागू भए उपयुक्त हुने थियो । आफ्नो प्रधानमन्त्रीप्रति देश र जनताको अपेक्षा नै यही हो,’ राणाले आइतबार ट्वीट गर्दै भनेका छन् ।

कोरोना संक्रमण दोस्रो चरणमा रहेको बेला सतर्कता र सावधानी झन् आवश्यक रहेको उनको ठहर छ । ‘यसका लागि प्रधानमन्त्रीको सम्बोधनमा उल्लेख घोषित नीतिको कार्यान्वयन जरूरी छ,’ उनले भने ।

प्रधानमन्त्रीको सम्बोधन कै प्रतिक्रियास्वरूप राणाले संयम र एकतामा जोड दिए । उनले भने, ‘जनस्तरको आलोचना, अपेक्षा र सुझावप्रति तिक्तता नपोखौं, महामारीविरुद्ध एकढिक्का बसौं । तेस्रो चरणको जोखिम परास्त गर्न आफैंले आफैंलाई सफल भयौं भनेर ढुक्क नबसौं ।’

महामारीको जोखिम र स्थानीय तहको बढ्दो संवेदनशीलताका बाबजुद सरकारको काममा कमीकमजोरी जारी रहेको उनले बताए । सरकारको भनाई र गराईमा एकतारूपता नदेखिएको भन्दै अध्यक्ष राणाले भने, ‘द्रुत परीक्षण अघि बढाउने भने पनि बझाङमा भएको मेलाले यसको उल्लंघन भएको देखिन्छ । यस्तो उल्लंघन कडाइकासाथ रोकिनु पर्छ । सरकारकै भनाईमा उपकरण औषधि अपूग छ, विदेशबाट पर्याप्त आयात भएको छैन ।’

स्वास्थ्य संवेदनशीलतामा जोड दिँदै उनले भने, ‘क्वारेन्टाइनमा सामाजिक दूरी कायम नभएको समाचार छ । निरन्तर सचेतना, सावधानी जरूरी छ ।’