प्रधानमन्त्री ज्यु ! भ्रष्ट्राचारबारे आवाज उठाउनु बेमौसमी बाजा हो ? राप्रपा अध्यक्ष डा.लोहनी

२६ चैत्र, काठमाडौं । राष्ट्रिय प्रजातन्त्र पार्टी (राप्रपा) का अध्यक्ष डा. प्रकाशचन्द्र लोहनीले भ्रष्ट्राचारका घृणित कार्यको विरोध बेमौसमी बाजा नभएको भन्दै प्रधानमन्त्री केपी ओलीलाई चुनौति दिएका छन् ।

प्रधानमन्त्री ओलीले मंगलबार देशबासीको नाममा दिएको सम्बोधनप्रति प्रश्न गर्दै लोहनीले सत्ताको दुरूपयोग र लुटविरुद्ध निरन्तर आवाज उठाउने घोषणा गरेका छन् । उनले भने, ‘माफ गर्नुहोस् प्रधानमन्त्रीजी, मौसमी बाजा बजाउने नाममा यो देशमा देखिएको सत्ताको दुरूपयोग र महासंकटमा पनि जनताले तिरेको करको लुटविरुद्ध हामी निरन्तर अवाज उठाउने छौं । तपाईको भाषणले यो रोकिने छैन ।’

राप्रपाका अध्यक्ष लोहनीले प्रधानमन्त्रीको सम्बोधनप्रति केही आधारभूत प्रश्न उठाएका छन्, ‘मौसमी बाजा भनेको के हो ? बेमौसमी बाजा के हो ? सम्माननीय प्रधानमन्त्रीजीको भाषणपछि यस्ता प्रश्न उब्जेको छ ।’

हालैका दुई घटना उल्लेख गर्दै भ्रष्टाचारको विरोध गर्नु बेमौसमी नहुने उनले दावी गरेका छन् । प्रधानमन्त्रीलाई उनको प्रश्न छ, ‘सेक्युरिटी प्रेस खरिदको ठेक्कामा ७० करोड जनताको पैसा लुट्ने योजनाको विरोध गर्नु बेमौसमी बाजा हो ? कोरोना भाइरसको औषधि खरिद प्रक्रियामा देखिएको घृणित भ्रष्ट्राचारबारे छानविन गर भनेर आवाज उठाउनु बेमौसमी बाजा हो ?’