समाचारको प्रभाव : मन्त्री साहदेखि समाजसेवीहरुले दिए खाद्यान्न

♦ धीरुभाइ

२६, चैत सप्तरी । लकडाउनमा तीन सन्तासहित घुरनी भोकै, कतैबाट पाएनन् राहत शिर्षकको समाचार हिजो नेपालबहस डटकम अनलाइनमा छापिएपछि मन्त्रीदेखि समाजसेवीहरुको ध्यान तानिएको छ ।

यसैक्रममा प्रदेश २ भूमी व्यवस्था, कृषि र सहकारी मन्त्री शैलेन्द्रप्रसाद साहले व्यक्तिगत रुपमा उनलाई लकडाउन अवधिभरी पुग्ने गरी खाद्यान्न दिएका छन । शान्तीदेवी (घुरनी) सदालाई खाद्यन्न दिदै मन्त्री साहले लकडाउन अवधिभर घुरनीको सम्पूर्ण खाद्यान्न तथा थप खर्च व्यक्तिगत रुपमा उपलब्ध गराउने बताए ।

फरक क्षमता(अपाङ्गता) भएका तीन सन्तानकी एकल एक महिला घुरनीलाई बुधबार मन्त्रीसहित विभिन्न समाजसेवीहरु समेत खाद्यान्न राहत दिएका हुन । खुल्ला आकाशमुनी बस्दै आएकी सप्तरीको बिष्णुपुर गाउँपालिका वार्ड नम्बर ६ रन्जितपुरका धुरनीको अवस्थाबारे धीरुभाइले लेखेको समाचार नेपालबहस अनलाइनमा प्रकाशित भएपछि तत्कालै मारवाडी समाज सप्तरीका थानसिंह भन्साली, बैजु जोशीले खाद्यान्न उपलब्ध गराएका हुन ।

त्यस्तै सोही समाचार पढेर महिला बालबालिका तथा युवा सशक्तिकरण नेपाल अध्यक्ष तथा गैसस अध्यक्ष बौआलाल यादव र समाजसेवी महिला नेतृ रमिला साहसमेत बुधबार खाद्यान्न प्रदान गरेका छन् । उनीहरुले चामल, दाल, आलु, खाने तेल, नून, साबुन लगायतको अति आवश्यक खाद्यान्न सामग्री प्रदान गरेका हुन ।

कसरी बित्छन घुरनीको दैनिकी ?

अरुको घरमा सानोतिनो मजदुरी गरी घुरनी सदा दिन काट्ने गरेकी छन् । कोरोना भाइरस (कोभिड १९)को संक्रमणबाट बच्न र बचाउन लकडाउन गरेपछि उनको मजदुरी पनि बन्द भएको छ । एकदिन बिताउन उनलाई एकदमै कठिन अवस्था छ । करिब सात वर्ष अघि श्रीमान घुरन सदा बितेपछि तीन छोराछोरीको लालनपालनको जिम्मेबारी घुरनी उपर नै थपिएकाे छ ।

शारीरिक रुपमा कमजोर भएपनि सानो छोराछोरीको लालनपालन गर्न गाउँघरमै अर्काको सानोतिनो काम गरेर जसोतसो दैनिक गुजार गर्दै आएकी घुरनीलाई लकडाउनमा ती काममा पनि नलगाउँदा भोकै बस्नु परेको थियो । घुरनीसँगै उनका तीन सन्तान पनि कसले कुन बेला आहार देला भनेर बाटो कुरिरहेका थिए । उनले प्राप्त गरेको राहत खाद्यान्न अमृत सरह भएको छ ।

फरक क्षमताका घुरनीको घरघडेरी नभएका कारण सदा बस्ती नजिक रहेको दलित छात्रावासको निर्माणाधिन भवनमा बस्दै आएका छन । जेठो छारो १० वर्ष, दुई वटा छोरी क्रमशः आठ र छ वर्षको रहेको छ । शारीरिक अशक्ताले अन्न जोहो गर्न नसकेका दिन छोराले नजिककै चोकमा मागेर घर लगेपछि सबै जना बाँडीचुडी खाएर छाक टार्दै आएकी छिन ।