विश्वभर भाइरसबाट ८८ हजारकाे मृत्यु, १५ लाखभन्दा धेरै सङ्क्रमित

२७ चैत्र, एजेन्सी । कोरोना भाइरसका कारण मृत्यु हुनेको संख्या ८८ हजार नाघेको छ । पछिल्लो तथ्याङ अनुसार कोरोनाले मृत्यु हुनेको संख्या ८८ हजार ४ सय ९५ पुगेको हो। यो समाचार तयार पार्दासम्म विश्वभर १५ लाखभन्दा धेरै सङ्क्रमित भएका छन् ।

कोरोनाले पछिल्लो समय सबैभन्दा धेरै अमेरिकामा १४ हजारको ज्यान गएको छ । त्यहाँ बुधबार मात्रै १४ सय जनाको ज्यान गएको छ । यो समाचार तयार पार्दासम्म १४ हजार ७ सय ७८ जनाको ज्यान गएको छ । यस्तै स्पेनमा पनि १४ हजार ७ सय ९२ को ज्यान गएको छ । अमेरिकामा ४ लाख ३४ हजार र स्पेनमा १ लाख ४८ हजार संक्रमित छन ।

इटालीमा अहिलेसम्मकै धेरै १७ हजार ६ सय ६९ जनाको मृत्यु भएको छ । त्यहाँ १ लाख ३९ हजार संक्रमित छन । यस्तै फ्रान्समा १० हजार ८ सय ६९ र बेलायतमा ७ हजार ७९ जनाको ज्यान गएको अन्तराष्ट्रिय सञ्चारमाध्यमले जनाएका छन ।

अहिलेसम्म संसारभर कोरोनाबाट संक्रमित हुनेको विश्वभर १५ लाख १५ हजार ५ सय १८ पुगेको छ । यो समाचार तयार पार्दासम्म ३ लाख ३० हजार ५ सय ८९ जना उपचार पछि निको भएर घर फर्केका छन् संक्रमित छन । चीनको वुहान राज्यबाट फैलिएको महामारी कोरोनाबाट नेपालमा ९ जना संक्रमित छन ।

पछिल्लो समय २३ सय जनामा परीक्षण गर्दा ९ जनामा मात्रै संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । भारतमा पनि कोरोना सङ्क्रमणका कारण १ सय ५० जनाको ज्यान गएको भारतीय सञ्चारमाध्यमले जनाएका छन् । त्यस्तै झण्डै ६ हजार मानिसमा कोरोना सङ्क्रमण भएको जनाएको छ ।

यसैबीच भारतमा दिल्ली सरकारले घरबाहिर निस्कँदा अनिवार्य रुपमा मास्क ‘मुखावरण’ लगाउनुपर्ने आदेश दिएको छ । यस्तै दिल्ली र उत्तर प्रदेश सरकारले कोरोनाको बढी सङ्क्रमण देखिएको क्षेत्र बन्द गर्ने घोषणा गरेको छ ।

आगराको २२, गाजियावादको १३, नोएडा र कानपुरको १२ तथा वाराणसीको चार क्षेत्रलाई बन्द गर्ने सूचीमा राखिएको भारतीय सञ्चारमाध्यमले जनाएका छन् ।