भिडियो भाइरलपछि कांग्रेस नेताले एकल महिलाको उद्धार गरी दिए राहत

धीरुभाई

१ वैशाख, राजविराज । सामाजिक सञ्जालमा एक भिडियो सार्वजनिक भएपछि नेपाली कांंग्रेसका एक नेताले त्यो परिवारको उद्धार गरी राहत वितरण गरेका छन् ।

सप्तरीको क्षेत्र नम्बर ४ का प्रतिनिधि सभा सदस्य एवं नेपाली कांग्रेस नेता तेजुलाल चौधरीको सचिवालयले एक फरक क्षमताका एकल महिलालाई उद्धार गरी राहत प्रदान गरेको हो । जिल्लाको खडक नगरपालिका वडा नम्बर ३ कञ्चिरा सिमरा टोलका सुकुम्बासी बोल्न नसक्ने एकल महिला परिवारलाई राहत प्रदान गरेको छ ।

उनको अवस्थाबारे सामाजिक सञ्जालमा भिडियो भाईरल भएपछि प्रतिनिधि सभा सदस्य चौधरीको पहलमा सचिवालयका सदस्यहरूले उद्धार गरी २५ किलो चामल, दुई किलो दाल, दुई किलो च्युरा, एक लिटर खानेतेल, एक प्याकेट नून, दुई किलो आलु, एक दर्जन साबुन, छ वटा मास्क प्रदान गरेको तेजेन्द्र सन्तोषीले जानकारी दिए । छ वर्ष अघि पतिको मृत्यु भएपछि कान नसुन्ने आमा र छोरा एकसाथ बस्दै आएका छन ।

फोटो क्याप्सन : फरक क्षमताका एकल महिलालाई राहत प्रदान ।