संक्रमित भित्रिएपछि भारतसँगको सीमानाका बन्द

२ वैशाख काठमाडौं । सरकारले भारतसँगको सीमानाका अनिश्चितकालका लागि बन्द गरेको छ । मंगलबार बसेको मन्त्रिपरिषद बैठकले लकडाउन थप १२ दिन बढाउने निर्णय गरेसँगै दक्षिण छिमेकी भारतसँगको सीमानाका अनिश्चितकालका लागि बन्द गरेको हो ।

भारतमा दैनिक हजारौमा कोरोना संक्रमण फैलिन थालेपछि दक्षिण सीमा बन्द गर्नुपरेको एक मन्त्रीले जानकारी दिए । भारतमा यो समाचार तयार पार्दासम्मा १० हजार ५ सय ४१ जनामा कोरोना पुष्टि भएको छ । ३ सय ५८ जनाको ज्यानै गएको छ ।

नेपालमा पछिल्लो समय भारतबाट आउनेहरुमा कोरोना संक्रमण देखिन थालेपछि अनिश्चितकालका लागि सीमा बन्द गर्ने निर्णय भएको ती मन्त्रीले बताए । भारतमा संक्रमित भएका नेपाली पनि भागेर वा पैदलै हिडेर भित्रिन थालेपछि सरकारले सीमामा कडाई गरेको हो ।

उत्तरी छिमेकी चीन र दक्षिण छिमेकी भारतसँगको सीमा पूर्ण रुपमा बन्द गरेको सरकारले बैशाख १८ गतेसम्म अन्तराष्ट्रिय उडान पनि ठप्प पारेको छ ।