भारतको जमातबाट फर्किएका दुईमा कोरोना पोजेटिभ, दुई टोल शिलबन्दी, संक्रमित आइसोलेसनमा भर्ना

♦ धीरुभाई
३ बैशाख, सप्तरी । सप्तरीको दुई छुटछुट्टै स्थानीय तहका दुई टोलबस्तीको शिलबन्दी गरिएको छ । भारतबाट फर्किएका जमातीको ¥यापिड डाईग्नोस्टिक टेस्ट रिपोर्टमा कोरोना पोजेटिभ पाइएपछि ती टोललाई बुधबारदेखि शिलबन्दी गरी उच्च निगरानीमा राखिएको छ ।

जिल्लाको तिलाठी कोइलाडी गाउँपालिका १ बेलही टोल र खडक नगरपालिका ११ को नन्कार जाँजर(बनौली) टोललाई शिलबन्दी गरी उच्च निगरानीमा राखिएको जिल्ला प्रहरी कार्यालय सप्तरीका प्रहरी उपरीक्षक कृष्ण प्रसाईले जानकारी दिए । ती दुई टोलमा घर बाहिर कसैलाई निस्किन नदिएको उनले बाहिरबाट समेत टोलभित्र पस्न नदिएको बताए ।

हिजो गरिएको ¥यापिड डाईग्नोस्टिक टेस्ट (आरडीटी)को रिपोर्टमा जमातबाट फर्किएका तिलाठी कोइलाडी गाउँपालिका १ का ५८ वर्षीय र खडक नगरपालिका ११ का ५१ वर्षीय गरी दुई जनामा कोरोनाको पोजेटिभ पाइएको थियो । दुई साता अघि विभिन्न सीमानाका भएर उनीहरुसहित नौ जना सप्तरी प्रवेश गरेका थिए ।

नेपाल प्रवेश गरेको थाहा पाएपछि स्थानीय प्रशासनले खोजी गरी परीक्षण गराउन आग्रह गरेपछि राजविराजस्थित गजेन्द्रनारायण सिंह अस्पतालमा उनीहरुको परीक्षण गराइएको थियो । तिलाठी कोइलाडी गाउँपालिकाबाट आएका एक जनामा पोजेटिभ पाइएकोले उनीसँगै आएका मोटरसाइकल चालकलाई समेत तत्कालै आइसोलेसनमा राखिएको छ । अर्को एकजना पैदल अस्पताल आएको बताइएको छ ।

मार्चमा भारत दिल्लीको निजामुद्दिनस्थित तबलिकी जमातमा सहभागी भएर फर्केका सप्तरीका आठजनामध्ये उनीहरु दुईजनाको रिपोर्टमा संक्रमण पाइएको गजेन्द्रनारायण सिंह अस्पतालका मेडिकल सुपरिटेन्डेन्ट डा. चुमनलाल दासले जानकारी दिएका छन् । जमातबाट फर्किएका सातजनाको आरडीटी गर्दा पाँचजनाको रिपोर्ट नेगेटिभ र दुईजनाको पोजिटिभ आएको बताउदै उनले भने, सातैजनाको थ्रोट स्वाब पीसीआर टेस्टका लागि धरानस्थित बीपी कोइराला स्वास्थ्यविज्ञान प्रतिष्ठान पठाइएका छौ । उनीहरुको रिपोर्ट आज राती वा भोली बिहानसम्म आउने उनले बताए ।

सो टेस्टमा संक्रमण पाइएका दुईजना र मोटरसाइकल चालक एक गरी तीनै जनालाई अस्पतालको आइसोलेसनमा राखेर उपचार शुरु गरिएको जानकारी दिदै मेसु दासले उनीहरुको अवस्था सामान्य रहेको र अहिलेसम्म कोरोनाको कुनै किसिमको लक्षण नदेखिएको बताए ।

उक्त टेस्टमा संक्रमित पाइएकाहरु गत मार्च ८ र ९ मा नयाँदिल्लीको निजामुद्दिन मस्जिदमा आयोजित मरकज (धार्मिक भेला) मा सहभागी भएर जमाती (धर्म प्रचारक)का रुपमा जिल्ला फर्किएको बताइएको छ । उनीहरु घरमै बसिरहेको सूचना पाएपछि स्थानीय प्रशासनले कोरोना परीक्षणका लागि आग्रह गरेपछि उनीहरुमध्ये सातजना हिजो परीक्षणका लागि राजविराज आएको जिल्ला प्रशासन कार्यालय सप्तरीका सूचना अधिकारी आनन्द ठाकुरले जानकारी दिए । आठ जनामध्येका एकजना अझै परीक्षणका लागि नआएको बताए । उनले दुईजनामा संक्रमण देखिएपछि उनीहरुको कन्ट्याक्ट ट्रेसिङ सुरु गरिएको जानकारी दिए । जमातबाट फर्किएका आठजना जमातीमध्ये खड्ग नगरपालिकाका तीनजना, राजविराज नगरपालिका, सुरुंगा नगरपालिका, तिलाठी कोइलाडी गाउँपालिका, विष्णुपुर गाउँपालिका र अग्नीसाइर कृष्णासवरण गाउँपालिकाका एकएकजना रहेको बताइएको छ ।

११ मौलानालाई क्वारेन्टाइनमा राखियो

यसैबीच भारत इन्दौरका ११ जना मौलाना जिल्लाको डिमनस्थित मस्जिदमा पाइएको जिल्ला प्रशासन कार्यालयका सूचना अधिकारी आनन्द ठाकुरले जानकारी दिदै उनीहरुलाई मस्जिदकै क्वारेन्टाइनमा राखिएको बताए । उनीहरुले लकडाउन हुनुअघिबाटै उक्त मस्जिदमा बसिरहेको बताएका छन् । उनीहरुको कोरोना परीक्षण गर्ने तयारी भइरहेको उनले जानकारी दिए ।

नौ युवालाई जिम्मा लगाइयो
त्यस्तै भारतको जयपुरस्थित गार्मेन्टसमा कार्यरत सप्तरीको कञ्चनरुप नगरपालिका २ महादेवपट्टीका नौ जना युवाहरुलाई नेपाल प्रहरीको जिम्मा लगाइएको छ । भारतको जयपुरबाट फर्किने क्रममा भारतीय बजार कुनौलीस्थित कन्या मध्य विद्यालयको क्वारेन्टाइनमा १४ दिन बसेपछि सप्तरीका नौ युवा मजदुरलाई हिजो भारतीय प्रहरीले तिलाठीस्थित नेपाल प्रहरीलाई जिम्मा लगाएको हो । तिलाठी कोइलाडी गाउँपालिकाको समन्वयमा हिजो नै उनीहरुलाई कञ्चनरुप नगरपालिकाको जिम्मा लगाइएको गाउँपालिकाका विपद् ब्यवस्थापन अधिकृत राजेशकुमार झाले बताए । तिलाठीस्थित प्रहरीले भारतबाट फर्किएका नौ जनालाई सुरक्षा तथा कोरोना भाइरससँग बच्ने उपायहरुको बारेमा जानकारी समेत गराउनु भएको छ ।

।